SNN-
لیژنە هاوبەشەکانی قائیمقامیەتی سلێمانی دەستیان بەسەر بڕێکی زۆر ماسی ڤێتنامیدا گرت کە بۆ خواردن شیاو نییە و هۆشداریش دەدرێتە هاووڵاتیان کە بە هیچ جۆرێک ئەو جۆرە ماسییە نەکڕن.
دەستبەسەرداگرتنی 500 کیلۆگرام ماسی
لە ئەنجامی گەڕان و بەدواداچوونە بەردەوامەکانی لیژنە هاوبەشەکانی قائیمقامیەتی سلێمانی، لە ناو کۆگایەکدا دەست بەسەر بڕی نزیکەی 500 کیلۆگرام ماسی براندی “ڕەحمە”دا گیرا. ئەم ماسییە هاوردەی وڵاتی ڤێتنامە و بەپێی ڕێنماییە فەرمییەکان، هاوردەکردن و فرۆشتنی لە بازاڕەکاندا بە هەموو شێوەیەک قەدەغە کراوە و بە کاڵایەکی نایاسایی هەژمار دەکرێت.
بڕیاری وەزارەتی کشتوکاڵ و هۆکاری قەدەغەکردن
دەروێش فەرەج، نوێنەری بەڕێوەبەرایەتی ڤێتێرنەری لە لیژنە هاوبەشەکان ڕایگەیاند، بەپێی نووسراوی فەرمیی وەزارەتی کشتوکاڵ، هاوردەکردنی ماسی لە وڵاتی ڤێتنامەوە بە تەواوی قەدەغەیە. هۆکاری ئەم بڕیارەش بۆ ئەوە دەگەڕێتەوە کە ئەو جۆرە ماسییانە بە کانزای زیانبەخش پیس بوون و بۆ خواردن شیاو نین، چونکە مەترسی بۆ سەر تەندروستی مرۆڤ دروست دەکەن.
هۆشداری بۆ هاووڵاتیان و سزای بازرگانان
نوێنەری ڤێتێرنەری داوای لە هاووڵاتیان کرد لە پێناو پاراستنی تەندروستی خۆیان، ئاگاداری جۆری ئەو ماسییانە بن کە دەیکڕن و بە هیچ جۆرێک ماسی بەستووی ڤێتنامی نەکڕن. جەختیشی کردەوە کە لە هەر مارکێت، فرۆشگا یان کۆگایەکدا ئەو جۆرە ماسییە ببینرێت، دەستبەجێ دەستی بەسەردا دەگیرێت و لەناودەبرێت، جگە لەوەش خاوەنی شوێنەکە ڕووبەڕووی سزای یاسایی توند دەکرێتەوە.
