موجتەبا خامنەیی هۆشداری دەداتە پەرلەمانتاران: دوژمنان دەیانەوێت دووبەرەکی ناوخۆیی دروست بکەن

SNN-

موجتەبا خامنەیی، ڕێبەری کۆماری ئیسلامیی ئێران، لە پەیامێکدا بەبۆنەی ساڵیادی کردنەوەی یەکەمین خولی پەرلەمان و دەستپێکی سێیەمین ساڵی کارکردنی خولی دوازدەیەم، چەند پەیام و هۆشدارییەکی گرنگی ئاڕاستەی پەرلەمانتاران کرد.

ڕێبەری کۆماری ئیسلامیی ئێران ڕاشیگەیاند دوای شکستی سەربازی و گەمارۆی ئابووری، ئێستا پلانی دوژمنان تێکدانی یەکڕیزی و دروستکردنی دووبەرەکی کۆمەڵایەتییە لە ناوخۆی ئێراندا.

چارەسەری قەیرانەکان

داوای لە پەرلەمان و محەمەد باقر قاڵیباف (سەرۆکی پەرلەمان) کرد کە هەماهەنگی تەواویان لەگەڵ حکومەت و دەسەڵاتی دادوەریدا هەبێت بۆ زاڵبوون بەسەر قەیرانە ئابوورییەکاندا.

دروشم و ئەرکی نوێ

جەختی لە چەسپاندنی دروشمی “ئابووریی خۆڕاگری لە سێبەری یەکڕیزیی نیشتمانیدا” کردەوە و داوای کەمکردنەوەی هەڵئاوسان و بووژاندنەوەی بەرهەمهێنانی کرد.

قەرەبووکردنەوەی وێرانکارییەکان

ئاماژەی بە تێپەڕبوونی سێ مانگ بەسەر “سێیەمین بەرگریی پیرۆز” کرد و داوای تەرخانکردنی هەوڵەکانی کرد بۆ ئاوەدانکردنەوەی وێرانکارییەکانی هەردوو “جەنگی سەپێنراوی دووەم و سێیەم”.

لە کۆتاییدا، موجتەبا خامنەیی داوای لە سەرجەم بەرپرسان کرد کە ڕێنماییەکانی (عەلی خامنەیی) بکەنە بنەمای سەرەکی بۆ کارەکانیان لە پێناو گەڕاندنەوەی هیوا بۆ پاشەڕۆژی وڵات.