لیژنەی دارایی پەرلەمان پشتگیری لە دامەزراندنی گرێبەستەکان و ڕەخساندنی 120,000 پلەی وەزیفی دەکات

SNN – 

لیژنەی دارایی لە پەرلەمانی عێراق پشتگیریی تەواوی خۆی بۆ ڕێنمایییەکانی سەرۆکی ئەنجومەنی وەزیران ڕاگەیاند سەبارەت بە دامەزراندنی هەمیشەیی سەرجەم فەرمانبەرانی گرێبەست و کرێکاران، هەروەها تەرخانکردنی 120,000 پلەی وەزیفی نوێ لە چوارچێوەی بودجەی ساڵی 2027دا.

عودەی عەواد، سەرۆکی لیژنەی دارایی پەرلەمانی عێراق ڕایگەیاند: “پێشوازی لە ڕێنمایییەکەی سەرۆکی ئەنجومەنی وەزیران دەکەین بۆ جێگیرکردنی فەرمانبەرانی گرێبەست و کرێکاران لەسەر میلاکی هەمیشەیی، لەگەڵ ڕەخساندنی 120,000 پلەی وەزیفی نوێ لە بودجەی ساڵی 2027دا.“

سەرۆکی لیژنەی دارایی ئاماژەی بەوەش کرد کە ئەم پلە وەزیفییانە بە شێوەیەکی دادپەروەرانە و بەپێی ڕێژەی دانیشتووان بەسەر پارێزگاکاندا دابەش دەکرێن، هەروەها پلاتفۆرمێکی تایبەتی دامەزراندن دەکرێتەوە بۆ ئەوەی یەکسانی و دەرفەتی یەکسان بۆ هەمووان مسۆگەر بێت.

جەختیشی کردەوە کە لیژنەی دارایی کار دەکات بۆ دابینکردنی تەرخانکراوی دارایی پێویست لە بودجەدا تاوەکو بڕیارەکە بە تەواوی جێبەجێ بکرێت و سەقامگیریی وەزیفی بۆ گەنجان بێتە دی.