پلاتفۆڕمی باینانس هاککرا و 6.3 ملیار دۆلاری لێ دزرا
SNN-
گەورەترین پێشێلکاریی ئەلیکترۆنی لە مێژووی کریپتۆدا؛ باینانس ملیارها دۆلاری لێ دزرا
لە یەکێک لە گەورەترین و مەترسیدارترین پێشێلکارییە ئەمنییەکانی مێژووی دراوە دیجیتاڵییەکاندا، پلاتفۆرمی باینانس کە بە گەورەترین بۆرسەی جیهانیی کریپتۆ هەژمار دەکرێت، ڕووبەڕووی هێرشێکی فراوانی ئەلیکترۆنی بووەوە و تێیدا نزیکەی 6.3 ملیار دۆلاری بە نایاسایی لیدزرا..
بەگوێرەی زانیارییە فەرمییەکان، هێرشکاران لە ڕێگەی دەستەگەیشتن بە ئامێری یەکێک لە ئەندازیارانی گەشەپێدانی پلاتفۆرمەکە توانیویانە کەلێنێکی ئەمنی بدۆزنەوە و دەست بگەنە کۆنتێنەری خزمەتگوزارییەکان بۆ ئەنجامدانی مامەڵەی گواستنەوەی پارە. لە بەرامبەردا، بەڕێوەبەرایەتیی کۆمپانیاکە جەختی لەوە کردەوە کە هێرشەکە تەنها سیستمی کارپێکردنی گرتووەتەوە و هیچ حاڵەتێکی دزەپێکردن یان دەستکارییەک لە کلیلە تایبەتەکانی جزدانی بەکارهێنەراندا تۆمار نەکراوە.
وەک هەنگاوێکی بەپەلە بۆ کۆنتڕۆڵکردنی دۆخەکە، باینانس سەرجەم پرۆسەکانی دانان و کشانەوەی داتا داراییەکانی بە شێوەیەکی کاتی ڕاگرت تاوەکو تیمە ئەمنییەکان پشکنینی گشتگیر ئەنجام دەدەن.
هاوکات لەگەڵ ئەم هەنگاوە، پلاتفۆرمە هاوبەشەکانی بلۆکچەین بە هانای کێشەکەوە هاتن؛ کۆمپانیای تێزەر بە فەرمی ڕایگەیاند کە سەرکەوتوو بووە لە بلۆککردنی نزیکەی 1.6 ملیار دۆلار کە پەیوەندیی بەم هێرشەوە هەبووە، و بە هاوئاهەنگی لەگەڵ تۆڕە جیاوازەکاندا کۆی گشتیی ئەو داراییە بلۆککراوانەی تاوەکو ئێستا گەیشتوونەتە نزیکەی 3 ملیار دۆلار. سەرەڕای قەبارەی گەورەی زیانەکان، باینانس لە ڕاگەیەندراوێکدا بەڵێنیدا کە تەواوی ئەو زیانە داراییانەی بە بەکارهێنەران گەیشتوون قەرەبوو دەکاتەوە.
ئەم قەبارە زەبەلاحەی دزینە، کە چوار هێندەی ئەو بڕە پارەیە کە ساڵی ڕابردوو لە پلاتفۆرمی (بایبیت) دزرا، نیگەرانیی قووڵی لەناو کۆمەڵگەی تەکنەلۆژیادا دروست کردووە. شارەزایانی ئاسایشی زانیاری ئاماژە بەوە دەکەن کە پەرەسەندنی خێرای تواناکانی هێرشبردنی پشتئەستوور بە ژیریی دەستکرد، لە داهاتوودا دەبێتە مەترسیەکی جددی لەسەر پاراستنی ژێرخانی تەکنەلۆژیی سیستمی دارایی دیجیتاڵی.
لە ڕووی کاریگەرییە بازارەییەکانەوە، دەستبەجێ دوای بڵاوبوونەوەی هەواڵەکە، بازارەکانی دراوی دیجیتاڵی کاردانەوەی توندیان هەبوو؛ نرخی بیتکۆین نزیکەی 5% و ئیسریۆم نزیکەی 6% پاشەکشەیان کرد، هاوکات دراوی تایبەتی پلاتفۆرمەکە (BNB) لە قۆناغی سەرەتای داڕمانەکەدا نزیکەی 10% دابەزینی تۆمار کرد پێش ئەوەی بەشێک لە بەهاکەی بە ڕێژەی 2.7% بەدەستبهێنێتەوە.
