ژنێكى ته‌مه‌ن 68 ساڵ به كۆرۆنا گیانى له‌ده‌ستدا له سلێمانى
گیان له‌ده‌ستدان به ڤایرۆسى كۆرۆنا | فۆتۆ: SNN
SNN – هه‌وراز ئه‌حمه‌د
سه‌رپه‌رشتیارى به‌شى چاودێرى چڕ له نه‌خۆشخانه‌ى شه‌هید ئاسۆ رایگه‌یاند: ئه‌مڕۆ سێشه‌ممه تووشبوویه‌كى كۆرۆنا گیانى له‌ده‌ستدا، وتیشى: “19 تووشبووى تر ژیانیان له مه‌ترسیدایه“.
د.ژیار مومتاز، سه‌رپه‌رشتیارى به‌شى چاودێرى چڕ له نه‌خۆشخانه‌ى (شه‌هید ئاسۆ) تایبه‌ت به تووشبووانى كۆرۆنا به (SNN) راگه‌یاند: “كه‌مێك له‌مه‌وبه‌ر ژنێكى ته‌مه‌ن 68 ساڵ كه دانیشتووى شارى سلێمانیيه پاش مانه‌وه‌ى بۆ چه‌ند رۆژێك له به‌شى چاودێرى چڕ گیانى له‌ده‌ستدا، كه چه‌ند نه‌خۆشییه‌كى درێژخایه‌نى له‌گه‌ڵدابوو”.
وتیشى: “له ئێستادا 19 تووشبوو له به‌شى چاودێرى چڕدان و دۆخیان رۆژ له‌دواى رۆژ به‌ره‌و خراپتر ده‌ڕوات و پێویستییان به ئامێرى هه‌ناسه‌دانى ده‌ستكرده”.
تا ئێستا له سلێمانى 25 كه‌س به هۆى ڤایرۆسى كۆرۆناوه گیانیان له ده‌ستداوه، له‌ماوه‌ى 24 كاتژمێرى رابردووشدا 95 حاڵه‌تى نوێى تووشبوون به ڤایرۆسه‌كه تۆماركراون.
