بەڕێوبەرایەتى کشتوکاڵى سلێمانى تاوتوێی ناردنى بەروبومى خۆماڵى بۆ ناوچەکانی عێراق دەکات
ANF Images
SNN-هەوراز ئەحمەد
بەڕێوبەرى کشتوکاڵى سلێمانى ڕایدەگەیەنێت: “لە ئێستادا وەرزى بەرهەمى خۆماڵیە، خۆشبەختانە جوتیاران لە ئەمساڵدا بەرهەمێکى زۆریان هەیە، بەڵام بەداخەوە وەکو پێویست لە بازاڕەکان ساغ نابێتەوە هۆکارى سەرەکى ساغ نەبونەوەى بەرهەمەکان بەهۆى قەدەغەى هاتوچۆى نێوان پارێزگاکانە”.
شاڵاو جەمال، بەڕێوبەرى کشتوکاڵى سلێمانى بە SNNی راگەیاند: “لە بارەى گرفتى ساغ نەبوونەوەى بەرهەمى جوتیاران سبەى لە سەر ئاستى پارێزگاى سلێمانى کۆدەبینەوە بۆ ئەوەى تاوتوێى ناردنى بەرهەمى خۆماڵى بکەین بۆ بەشێک لە پارێزگاکانى دیکەى عێراق لەوانە کەرکوک و دیالە”.
وتیشى: “لەم سنورەدا یەک کارگەى بەرهەمهێنانى دۆشاوى تەماتە بوونى هەیە کە دەکەوێتە پارێزگاى هەڵەبجەوە، ئێمە نوسراومان بۆ وەزارەتى بازرگانى و پیشەسازى کردوە بۆ ئەوەى بە زووترین کات بێنە سەر خەت، بزانین لەم وەرزى بەرهەمهێنانى تەماتەدا بۆ ئەو کارگەیە کار ناکات خۆ ئەگەر لەم کاتەدا کارگەیەکەى وا کارى پێنەکرێت نەبوونى باشترە”.
هاوکات ئاماژەى بەوەش کرد: “جوتیارێکى زۆر لە سەر رووبەرێکى بەرفراوان ئەمساڵ بەروبومى کشتوکاڵیان کردوە کە ئەوە جێگاى دڵخۆشیە، بەڵام دۆخى کۆرۆنا و قەدەغەى نێوان پارێزگاکان واى کرد ئەم بەرهەمانە لە ناوخۆدا دەرنەچێت و نەتوانرێت هەناردەى پارێزگاکانى ناوەڕاست و خوارووى عێراق بکرێت”.
