سەرۆکی فراکسیۆنی یەکێتی لە پەرلەمانی کوردستان دیاریکرا

SNN-هەوراز ئەحمەد

مەکتەبی سیاسیی یەکێتیی نیشتمانیی کوردستان بڕیاریدا زیاد جەبار وەک سەرۆکی فراکسیۆنی یەکێتی لە پەرلەمانی کوردستان دیاری بکرێت.

زیاد جەبار لە لێدوانێکیدا بۆ SNN رایگەیاند: “لە یەکی تەمووزەوە بە بڕیاری مەکتەبی سیاسی دیاریکراوم بۆ پۆستی سەرۆکی فراکسیۆنی یەکێتی لە پەرلەمانی کوردستان و ئەمڕۆ بڕیارەکەم بەدەستگەیشتووە”.

سەبارەت بە پلانەکانی، سەرۆکی نوێی فراکسیۆنی یەکێتی وتی: “ئێمە لە پەرلەمانین بۆ ئەوەی بەرنامە و ئەجێندای یەکێتی جێبەجێ بکەین، لە چەند رۆژی داهاتووشدا کۆبوونەوەی فراکسیۆنەکە بەڕێوەدەچێت بۆ دیاریکردنی ئەجێنداکانمان”.

ئەوەشی خستەڕوو: “سیاسەتی یەکێتی جێبەجێ دەکەین و کاردەکەین بۆ باشترکردنی ژیانی هاووڵاتیانن”.

ئەمەش لەکاتێکدایە پێشتر جەمال حەوێز پۆستی سەرۆکی فراکسیۆنی یەکێتی بەڕێوەدەبرد.