زانایان: تا هاوینی 2050 بەستەڵەکی باکوور دەتوێتەوە
توێژه‌رانی ئەڵمانیا پێشبینی دەکەن، بەهۆی گەرمبوونی زەوییەوە لە هاوینی ساڵی 2050 دا بەستەڵەکی باکوور بەتەواوەتی بتوێتەوە.
بەگوێرەی توێژینەوەیەکی زانکۆی هامبۆرگ لە ئەڵمانیا کە ماڵپه‌ری ساینس دەیلی ئەنجامەکەی خستووەتەڕوو، بەهۆی کاریگەری گەرمبوونی زەوییەوە شاخە سەهۆڵبەندەکانی بەستەڵەکی باکوور بەردەوامن لە توانەوە، بەجۆرێک ئەگەر ماددەی هایدرۆكاربۆن به‌خێرایی و به‌ڕێژه‌یه‌كی زۆریش لە هەوادا كه‌م بكرێته‌وه، ناتوانرێت ڕێگە لە توانەوەی سەهۆڵبەندەکان بگیرێت.
دێریک نۆتز لەبارەی توێژینەکەوە رایگەیاندووە: “تەنانەت ئەگەر تێکڕای گشتی بەرزبوونەوەی پلەی گەرمی لە خوار دوو پلەی سەدیشدا بهێڵدرێتەوە، تا ساڵی 2050 بەستەڵەکی باکوور دەتوێتەوە”.
ئەمە لەکاتێکدایە بە بڕوای بەشێکی زۆری زانایانی ژینگە و كەشوهەوا ئەگەر لە 10 بۆ 15 ساڵی ئایندەدا هیچ هەنگاوێكی جدی بۆ سنوورداركردنی زیادبوونی ڕێژەی گازەكانی قەتیسبوونی گەرمی لە هەوادا نەگیرێتەبەر چارەنوسی مرۆڤایەتی و ئاژەڵانیش دەکەوێتە مەترسیەوە.
