بەهۆی هێڵێکی ئاسمانی ئێرانەوە کۆرۆنا لە رۆژهەڵاتی ناوەڕاست بڵاوبووەوە

ماڵپەڕی بی بی سی عەرەبی، لە بەدواداچوونێکیدا ئاشکرایکردووە، هێڵی ئاسمانی ماهان ئێر-ی ئێرانی، هۆکاری گواستنەوەی ڤایرۆسی کۆرۆنایە بۆ رۆژهەڵاتی ناوەڕاست.

ئەو میدیایە ئەوەی خستووەتەڕوو، لەکاتێکدا کە حکومەتی ئێران راگرتنی گەشتە ئاسمانییەکانی راگەیاندبوو، هێڵی ئاسمانی ماهان ئێر بەردەوام بوو لە گەشتەکانی، ئەوەش هۆکاربوو بۆ گواستنەوەی ڤایرۆسەکە بۆ رۆژهەڵاتی ناوەڕاست.

بەگوێرەی داتاکان لە کۆتایی مانگی کانوونی دووەمی رابردووەوە تا کۆتایی مانگی ئازار، هێڵی ئاسمانی ماهان ئێر سەدان گەشتی ئاسمانی لە نێوان ئێران و عێراق و ئیمارات و سوریادا ئەنجام داوە.

ئاماژەش بەوەکراوە، هەموو ئەو وڵاتانەی دیکە مۆڵەتی نیشتنەوەیان بە فڕۆکەکانی ماهان ئێر داوە لەکاتێکدا قەدەغەی گەشتەکانیان لەگەڵ ئێراندا راگەیاندبوو.

چەند سەرچاوەیەک لە هێڵی ئاسمانی ماهان ئێر بە بی بی سییان وتووە، بەشێک لە سەرنشینەیانیان نیشانەی ڤایرۆسی کۆرۆنایان تیادا دەرکەوتووە، کاتێکیش ستافی فڕۆکەوانەکە ویستوویەتی نیگەرانییەکانیان لەوبارەیەوە بگەیەننە بەڕێوەبەرایەتی هێڵە ئاسمانییەکە، بێدەنگ کراون.