تەندروستی هەڵەبجە چۆنیەتی خەرجکردنی 500 ملیۆن دینارەکە ئاشکرادەکات

0
901
SNN-عەلی حەمە سەعید
وتەبێژی بەڕێوەبەرایەتی گشتی تەندروستی هەڵەبجە چۆنیەتی خەرجکردنی ئەو 500 ملیۆن دینارە رووندەکاتەوە کە دوێنێ حکومەتی هەرێم بڕیاری لەسەر ناردنی دا و دەڵێت: ئەو بڕە پارەیە بۆ ماوەیەکی کاتی کێشەکانمان چارەسەردەکات.
د. شاناز نەقشبەندی، وتەبێژی بەڕێوەبەرایەتی گشتی تەندروستی هەڵەبجە بە SNNی ڕاگەیاند: ئەو بڕی 500 ملیۆن دینارەی كە بریاریلێدراوە بۆ ڕووبەڕووبوونەوەی كۆرۆنا لە پارێزگای هەڵەبجە خەرجبكرێت دەتوانین بۆ ماوەیەكی كاتی چارەسەری گرفتەكانی پێبكەین، چونكە ماوەی نزیكەی مانگێكە لەلایەن خێرخوازانەوە پێداویستیەكانی ناو نەخۆشخانەكەمان دابیندەكرێن و دوای نیگەرانی و ئەنجامدانی كۆنگرەی ڕۆژنامەوانی پزیشكانی ڕووبەڕووبوونەوەی كۆرۆنا ئەو بڕە پارەیە تەرخانكرا.

ئاماژەی بەوەشكرد: كاری لە پێشینەمان لە خەرجكردنی ئەو بڕە پارەیە بریتیە لە كڕینی كیتی تایبەت بە پشكنینی كۆرۆنا كە لە ئێستادا بەرەو تەواو بوون دەجێت، هاوكات ئەگەر ڕێژەی تووشبوون بەكۆرۆنا زۆر زیاتر نەبێت و پێداویستی پزیشكیمان زیاتر نەوێت ئەوا دەتوانین ئامێری تایبەت بە جیاكردنەوەی پلازمای خوێن بۆ بانكی خوێنی هەڵەبجە دابینبكەین، كە لە ئێستادا نەخۆشەكانمان دەنێرینە سلێمانی بۆ وەرگرتنی پلازمای خوێن.

وتەبێژەكەی بەڕێوەبەرایەتی گشتی تەندروستی هەڵەبجە ئەوەشی خستەڕوو: لە ئێستادا ڕێژەی تووشبوون بە كۆرۆنا لە سنووری پارێزگای هەڵەبجە ڕوو لە زیاد بوونە، ژمارەی تووشبوون هەزار كەسی تێپەڕاندووە 18 كەس گیانیان لەدەستداوە، ماوەی زیاد لە دوو هەفتەیە ڕێژەی لە%50 ئەنجامی پشكنینەكان ئەوە دەردەخەن كە هەڵگری ڤایرۆسی كۆرۆنان، هوكات نەخۆشخانەی وەفا لە لێواری پڕبووندایە، بۆیە هەموو هەوڵێك دەدەین ئەوەی لەتواناماندابێت بۆ خزمەتی نەخۆشانی سنوورەكە ئەنجامی بدەین.

Share it:
Previous Next
Close
Test Caption
Test Description goes like this