شاراپۆڤای شۆخ و شه‌نگ ده‌چێته نێو لیستی 100ده‌وڵه‌مه‌ندترین خانمانی ئه‌مریكا
ماریا شاراپۆڤا
SNN Sport
گۆڤاری (فۆربیس)ی ئه‌مریكی كچه یاریزانی پێشووی تێنسی سه‌رزه‌وی رووسیا ماریا شاراپۆڤای خسته نێو لیستی 100 ده‌وڵه‌مه‌ندترین خانمانی ئه‌مریكا.
ماریا شاراپۆڤا كه له ساڵی 1995ه‌وه له ئه‌مریكا ده‌ژی ، ریزبه‌ندی 87ی پۆلێنی نوێی ده‌وڵه‌مه‌ندترین خانمانی ئه‌مریكای به‌ده‌ستهێناوه و داهاتەکەی به نزیكه‌ی 200 ملیۆن دۆلار ده‌خه‌ڵمێنرێت.
هه‌روه‌ها كچه یاریزانی تێنسی سه‌رزه‌وی ئه‌مریكی سیرینا ولیامز چووه نێو لیسته‌كه و ریزبه‌ندی 83ی ده‌ستەبه‌ركردووە به داهاتێک به نزیكه‌ی 225 ملیۆن دۆلار ده‌خه‌ڵمێنرێت.
دیانا هندریكس دامه‌زرێنه‌ری كۆمپانیای” ABC Supply” یه‌كه‌می پۆلێنه‌كه‌یه بۆ دووه‌مین ساڵی له سه‌ر یه‌ك به داهاتێک کە ده‌گاته 8 ملیار دۆلار.
جێی باسه ماریا شاراپۆڤای (33 ساڵ ) له مانگی شوباتی رابردوودا كۆتاییهێنا به كاروانی پیشه‌گه‌ریانه‌ی خۆی له یاریگاكانی تێنسی سه‌رزه‌وی.
ئه‌و شۆخ و شه‌نگه رووسییه له میانه‌ی كاروانی پیشه‌گه‌ریانه‌ی خۆی 36 نازناوی به‌ده‌ستهێناوه ، 5 نازناویان له چوارچێوه‌ی زنجیرەی چوار پاڵه‌وانێتییه گه‌وره‌كه‌ی ( گراند سلام ) ه ، هه‌روه‌ها بۆ ماوه‌ی 21 هه‌فته له سه‌ر ته‌ختی پۆلێنی كچه یاریزانانی پیشه‌گه‌ر دانیشت.
