34 کۆچبەری خەڵکی هەرێم لەخنکان رزگارکراون

SNN-عەلی حەمەسەعید

سەرپەرشتیاری دەزگای لوتکە رایگەیاند، یەختێک کە 34 کۆچبەری خەڵکی هەرێمی کوردستان و چەند وڵاتێکی دیکەی تێدابووە، لە کەناراوەکانی تورکیا پەکیکەوتووە و کەشتییەکی میسری لەخنکان رزگاریکردوون.

ئاری جەلال بە SNNی راگەیاند: ئەو 34 کۆچبەرەی هەرێم یەکشەممەی رابردوو، 18ی مانگ، لە یەختێکدا بوون کە کۆچبەری تورکی و عێراقی و میسری و ژمارەیەک کۆچبەری رۆژهەڵاتی کوردستانی تێدابوو، کۆی ژمارەی کۆچبەرەکان 57 کەس بوون، رۆژی 20ی مانگ لە کەناراوەکانی تورکیا یەختەکەیان پەکیکەوت.

وتیشی: ئەو رۆژەی کە یەختەکەیان پەکیکەوتووە هیچ لایەنێک نەچووە بە هانایانەوە تا رۆژی دواتر کەشتییەکی هێزی دەریایی میسری لە خنکان رزگاریکردبوون و ئەوانی گواستووەتەوە بۆ میسر.

ئاری جەلال رایگەیاندووە، دەزگاکەیان پەیوەندی بە دەسەڵاتدارانی میسرەوە کردووە بۆ چارەسەرکردنی کێشەی یاسایی ئەو کۆچبەرانە، بڕیاریشە دیپۆرتی هەرێمی کوردستان بکرێنەوە.

ئاماژەشی بەوەکرد: کۆچبەرەکان خەڵکی شار و شارۆچکە جیاوازەکانی هەرێمی کوردستانن.