“بهمزووانه حكومهتى ههرێم 14 ملیار دینار بهسهر كهمدهرامهتاندا دابهشدهكات”
دراوى 25 ههزار دینارى عێراق | فۆتۆ: SNN
SNN – عەلی حەمە سەعید
وتەبێژی وەزارەتی كار و كاروباری كۆمەڵایەتی حكومەتی هەرێم رایدهگهیهنێت: سەرجەم رێكارەكانی تایبەت بە دابەشكردنی بڕی 14 ملیار دینار بەسەر كەمدەرامەتانی هەرێمی كوردستان كۆتایی هاتووە، دهشڵێت: ” تەنیا ئەوە ماوە لەڕێگەی ههژمارێكى بانكییەوە پارەكە دابەشبكەین”.
ئاریان ئەحمەد، وتەبێژی وەزارەتی كار و كاروباری كۆمەڵایەتی حكومەتی هەرێم بە SNNی راگەیاند: “لەگەڵ ئەوەی دەبوو زووتر دەستمان بكردایە بە دابەشكردنی ئەو بڕە هاوكارییەی كە لەلایەن خێرخوازان و سەرمایەدارانی هەرێمەوە لەكاتی كەرەنتینەی گشتی كۆكرایەوە و بڕەكەی 14 ملیار دینارە، بەڵام بەهۆی زۆری ژمارەی كەمدەرامەتان و هاوكات چەند گرفتێكی دیكەوە دابەشكردنی ئەو پارەیه دواكەوت، بەڵام لە ئێستادا هەموو ئامادەكارییەكمان كردووە بۆ دابەشكردنی ئەو پارەیە”.
وتیشى: “ئەو 14 ملیار دینارە دابەشدەكرێت بەسەر 140 هەزار خێزاندا، بەجۆرێك كە هەر خێزانێك بڕی 100 هەزار دیناری پێدەدرێت، تەنیا بۆ یەكجارە ئەو هاوكارییە، پارەكە لە ههژمارى بانكى وەزارەتی كار و كاروباری كۆمەڵاییەتییە و ئەو كەسانەشی كە هاوكارییەكەیان بەسەردا دابەشدەكرێت ناوەكانیان لەبەردەستدان و ئامادەن”.
وتەبێژەكەی وەزارەتی كار و كاروباری كۆمەڵایەتی ئەوەشی خستەڕوو: “ئێمە 19 بەڕێوەبەرایەتیمان هەیە كە دەبێت ناوەكانمان بۆ بنێرن، ناتوانین هەموویان بەیەكەوە دەستبكەین بە دابەشكردنی پارەكە، بە گوێرەی ریزبەندی دەبێت، هەركات ئەوان تەواوبوون ئێمەش لەڕێگەی بانكەكانەوە دەستبە دابەشكردنی پارەكە دەكەین”.
