فەڕەنسا… دەیان خۆپیشاندەر دەستگیر کران و زیاتر لە 60 پۆلیس بریندارن
وێنەی خۆپیشاندانەکان
SNN
بەهۆی دژایەتیکردنی دەرچوواندنی یاسایەکەوە بەناوی (ئاسایشی گشتگیر) خۆپیشاندان و ناڕەزایەتی لە فەڕەنسا بەردەوامیی هەیە و برینداربوونی دەیان پۆلیس و دەستگیر کردنی دەیان خۆپیشاندەری بەدواوە بووە.
میدیاکانی فەڕەنسا دەڵێن ئەمڕۆ یەکشەممە تەنیا لە شاری پاریس 23 پۆلیس بریندار بوون و لە شارەکانی دیکەش 39 کارمەندی هێزە ئەمنییەکان بە برینداریی گەیەنراونەتە نەخۆشخانەکان.
لە دوێنێ شەممەوە خۆپیشاندانی فەڕەنسییەکان لە دژی توندوتیژییەکانی پۆلیس بەردەوامیی هەیە و بەپێی چەند گرتەیەکی ڤیدیۆیی، ژمارەیەک خۆپیشاندەر لە هێزە ئەمنییەکانی فەڕەنسا دەدەن و برینداریان دەکەن.
لە مادەی 24ی یاسای ئاسایشی گشتگیردا هاتووە، هەر کەسێک بە پاڵنەری نیاز خراپیی وێنە یان گرتەیەکی ڤیدیۆیی هێزە ئەمنییەکان بڵاو بکاتەوە، ساڵێک بەند دەکرێت و 45 هەزار یۆرۆش غەرامە دەکرێت، کە ئەوەش ناڕەزایی فەڕەنسییەکانی بەدواوە بووە.
