داعش هێرشیکردە سەر گوندێکی خانه‌قین و بریندار هەیە

سیروان حه‌سه‌ن 

كه‌مێك له‌مه‌وبه‌ر چه‌كدارانى داعش به‌ چه‌كى هاوه‌ن و قه‌ناس په‌لامارى هێزه‌ عێراقییه‌كان و هاووڵاتیانى ناوچه‌یه‌كى نێوان‌ خانه‌قین بۆ جه‌له‌ولایاندا و به‌هۆیانه‌وه‌ دوو سه‌رباز و سێ هاووڵاتى برینداربوون. 

شه‌مال عه‌بدولره‌حمان به‌رێوه‌به‌رى ئاسایشى كۆكس به‌  SNNی راگه‌یاند: نزیكه‌ى نیو كاتژمێر له‌مه‌وبه‌ر چه‌كدارانى داعش به‌چه‌كى قه‌ناس تەقەیان لە هێزێكى سوپاى عێراقی له‌ گوندى ئیسلاحى سه‌ر به‌ ناحیه‌ى جه‌له‌ولا له‌ سنوورى خانه‌قین کردووە.

وتیشى، چه‌كداره‌كان هاوكات به‌ چه‌كى هاوه‌ن په‌لامارى گونده‌كه‌یاندا و له‌ ئه‌نجامدا دوو سه‌ربازى سوپاى عێراق به‌ چه‌كى قه‌ناس و سێ هاووڵاتى مه‌ده‌نیش به‌هۆى كه‌وتنه‌ خواره‌وه‌ی گوله‌ هاوه‌نه‌كان بۆ نێو گونده‌كه‌یان برینداربوون.