پۆمپیۆ: رووسیا دوژمنمانە و هێرشە ئەلیکترۆنییەکەش دەستی ئەوی تێدایە

SNN

وەزیری دەرەوەی ئەمریکا رووسیا دەخاتە ناو لیستی دوژمنەکانی ئەمریکاوە و رایدەگەیەنێت “ئەو هێرشە ئەلیکترۆنییەی بەمدواییە کرایە سەر ناوەندە هەستیارەکانی ئەمریکا مۆسکۆ دەستی هەیە تیایاندا”.

پۆمپیۆ لە چاوپێکەوتنێکیدا لەگەڵ فۆکس نیوز رایگەیاند “پرسیارم لێدەکرێت لەبارەی ئەوەی کێ دوژمنی ئەمریکایە، منیش دەڵێم یەکێک لە دوژمنە سەرەکییەکان رووسیایە”.

وتیشی: “ڤلادیمێر پۆتین سەرۆکی رووسیا بووەتە مەترسی بۆ سەر ئەو کەسانەی ئازادییان خۆشدەوێت”.

لەبارەی هێرشی ئەلیکترۆنیش کە بەمدواییە بۆ سەر چەند ناوەندێکی هەستیاری حکومەتی ئەمریکا ئەنجامدرا، وەزیری دەرەوەی ئەمریکا دەڵێت: “ئێستا دەتوانین بڵێین رووسیا هۆکاری سەرەکیی ئەنجامدانی ئەو هێرشەیە و وەک لایەنی سەرەکی تێکدانی سیستمە ئەلیکترۆنییەکان هاوکاری هاککەرانی کردووە”.