یەکەم تووشبووی کۆرۆنای نوێ لە ئەڵمانیا دیاریکرا

SNN

حکومەتی ئەڵمانیا تووشبوونی هاووڵاتییەکی خۆی بە کۆرۆنا نوێیەکە راگەیاند کە خانمێکی بەتەمەنە و بەسەردانێک لە بەریتانیا بووە و گەڕاوەتەوە بۆ ئەڵمانیا.

وەزارەتی تەندروستیی هەرێمی فۆرتمبێرگ لە باشووری ئەڵمانیا رایگەیاندووە “ئەو خانمە 20ی ئەم مانگە لە فڕۆکەخانەی فرانکفۆرت پشکنینی بۆ کراوە و ئەنجامەکەی دەریخستووە تووشی نەوەی نوێی کۆرۆنا بووە”.

بەپێی راگەیەنراوێکی وەزارەتەکە لە تویتەر، ئەو ژنە ئەڵمانییە بە ئۆتۆمبێلێکی تایبەت گواستراوەتەوە بۆ ناو خزم و کەسەکانی و بەتەنیا خراوەتە ژێر کەرەنتینەوە.

رۆژی 14ی ئەم مانگە مات هانکوک وەزیری تەندروستیی بەریتانیا رایگەیاند “زانایانی وڵاتەکەی جۆرێکی نوێی کۆرۆنایان دۆزیوەتەوە کە پێیدەوترێت B. 1.1.7 و تائێستاش روون نەبووەتەوە کە لە کۆرۆنای یەکەمجار تووند ترە یاخود نا”.

جۆری یەکەمی ڤایرۆسی کۆرۆنا لە کانوونی یەکەمی ساڵی رابردوو لە ووهانی چین دۆزرایەوە کە ئێستا لە سەرانسەری جیهان بڵاوبووەتەوە.

جۆری دووەمی ڤایرۆسەکە، هەفتەی رابردوو لە بەریتانیا دۆزرایەوە کە بە وتەی وەزیری تەندروستیی ئەو وڵاتە، خێرایی گواستنەوەی 70% لە جۆری یەکەم زیاترە.

لەگەڵ دەرکەوتنی جۆری دووەمی ڤایرۆسی کۆرۆنا، نزیکەی 50 وڵات سنوورەکانیان لەگەڵ بەریتانیا داخست، لە ناوخۆی بەریتانیاش رێکارە خۆپارێزییەکان تووندتر کراون.