بانکی نێودەوڵەتی داوایکردووە عێراق نرخی دۆلار بۆ 166 هەزار دینار بەرز بکاتەوە
پارەی بیانی و عێراقی
SNN
جێگری سەرۆکوەزیرانی پێشووتری عێراق دەڵێت: “بانکی نێودەوڵەتی داوای لە حکومەتی عێراق کردووە بەهای فرۆشی دۆلار بۆ 166 هەزار دینار بەرز بکاتەوە بۆ هەر 100 دۆلارێک”.
بەها ئەعرەجی ئەمڕۆ یەکشەممە رایگەیاند “بۆ ئەوەی عێراق بکەوێتەوە سەر پێی خۆی، بانکی نێودەوڵەتی داوای لە بەغدا کردووە نرخی دۆلارێک بۆ 1660 دینار بەرز بکاتەوە”.
ئەعرەجی لە تویتەری خۆی نووسیوێتی: “ئایا لەم حاڵەتەدا حکومەت و پەرلەمان یەکهەڵوێست دەبن لە بەرامبەر وەها پێشنیازێکدا بە رەتکردنەوە یان قبوڵکردنی؟ یان هەندێک فراکسیۆنی سیاسی ئەمە دەقۆزێتەوە بۆ موزایەدە و خۆ دەرخستن وەک کاری پێشوویان؟”.
هەفتەی رابردوو بانکی ناوەندی عێراق لە راگەیەنراوێکدا ئاماژەی بەوەدا “کە بۆ لەبەرچاوگرتنی گۆڕانکارییەکان سەبارەت بە ئاڵوگۆڕی دۆلاری ئەمریکی بەرامبەر بە دیناری عێراقی لە بازاڕدا نرخی دیناری عێراقی بەرامبەر بە دۆلاری ئەمریکی جێگیرکردووە”.
بەپێی راگەیەنراوەکە لە رۆژی 20ی ئەم مانگەوە نرخی کڕینی دۆلاری ئەمریکی لە وەزارەتی دارایی عێراق بە 145 هەزار دیناری عێراقی جێگیر کرد و رایگەیاند “بۆ هەر 100 دۆلارێک و 100 دۆلاری ئەمریکی لە میانی فرۆشتنی ئاشکرا بە بانکەکان بە 146 هەزار دیناری عێراقی دەفرۆشرێت”.
هاوکات بڕی 100 دۆلاری ئەمریکی لەلایەن بانکەکانەوە بە فرۆشگاکانی ئاڵوگۆڕی دراو بە 147 هەزار دیناری عێراقی دەفرۆشرێت.
لە کۆتایی راگەیەنراوەکەدا داوا لە ھەموو لایەک کرا کە پابەندبن بەو بڕیارە و جەختیش کراوەتەوە لەوەی کە ئەوە، نرخی کۆتایی بەھای دیناری عێراقییە بەرامبەر بە دۆلاری ئەمریکی لە بازاڕدا و ھیچ گۆڕانکارییەکی بەسەردا نایەت.
