تاكە نەخۆشخانەی كۆرۆنا لە قەزای شارەزوور داخرا

SNN-عەلی حەمەسەعید
بە رەزامەندی بەڕێوەبەرایەتی گشتی تەندروستیی سلێمانی و بە ئاگاداری ئیدارەی سنوورەكە، تاكە نەخۆشخانەی تایبەت بە چارەسەری تووشبووانی كۆرۆنا لە سنووری قەزای شارەزوور و ناحییەی وارماوه‌ داخرا، بەڕێوەبەری نەخۆشخانەكەش ده‌ڵێت: “له‌دواى پشووه‌كانى سه‌رى ساڵ نه‌خۆشخانه‌كه‌ تایبه‌تده‌كرێته‌وه‌ به‌ خزمه‌تگوزارییه‌ ته‌ندروستییه‌ گشتییه‌كان”.

ئاگرین عومەر، بەڕێوەبەری مەڵبەندی تەندروستیی (شەهید دكتۆر چیا) لە ناحییەی وارماوه‌ى سەربە قەزای شارەزوور بە SNNی راگەیاند: “لە سەرەتای سەرهەڵدانی ڤایرۆسی كۆرۆناوە مەڵبەندەكەمان وەك تاكە نەخۆشخانەی تایبەت بە چارەسەری تووشبووانی كۆرۆنا لە سنووری قەزای شارەزوور و ناحییەی وارما دەستبەكاربووین ئەوەش بە رەزامەندی بەڕێوەبەرایەتی گشتی تەندروستیی سلێمانی، لەوماوەیەشدا توانیمان پێشوازی لە پێنج هەزار و 200 تووشبووی كۆرۆنا بكەین”.

وتیشى: “خۆشبەختانە بەهۆی نەمانی تووشبوون بە كۆرۆنا لە سنوورەكەماندا بە رەزامەندی بەڕێوەبەرایەتی گشتی تەندروستیی سلێمانی و بە ئاگاداری ئیدارەی سنوورەكە لە ئەمڕۆوە بڕیاماندا بە داخستنی ئەو تاكە نەخۆشخانەیەی كە تایبەتبوو بە چارەسەری تووشبووانی كۆرۆنا، لەدوای پشووی سەری ساڵیشەوە دەوامی ئاسایی پزیشكان و كارمەندانى تەندروستی لەو مەڵبەندە تەندروستییە دەستپێدەكاتەوە”.

بەڕێوەبەری مەڵبەندی تەندروستیی شەهید دكتۆر چیا ئەوەشی خستەڕوو: “لەماوەی كردنەوەی نەخۆشخانەكەماندا بەشی زۆری پزیشكان و كارمەندانی تەندروستی ناو نەخۆشخانەكە تووشی كۆرۆنا بوون، هاوكات یەك كارگوزاریشمان بەهۆی ڤایرۆسه‌كه‌وه‌ گیانی لەدەستدا، لەگەڵ ئەوەشدا هەر لەوماوەیەدا توانیمان حەوت هەزار و 470 پشكنینی كۆرۆنا ئەنجامبدەین”.