تورکیا: هەوڵ بۆ دروستکردنی فڕۆکەخانەی موسڵ دەدەین
وێنەیەکی کۆبوونەوەکە
SNN
باڵیۆزی تورکیا لە عێراق رایدەگەیەنێت “حکومەتی عێراق لە هەوڵدایە بە هاوکاری کۆمانیاکانمان کار بۆ دروستکردنی فڕۆکەخانەی موسڵ بکات”.
فاتح یەڵدز لەگەڵ حەمید عزی ئەمینداری گشتیی ئەنجوومەنی وەزیرانی عێراق ئەمڕۆ هەینی کۆبووەتەوە و دەڵێت: “ئامادەییمان نیشانداوە کار بۆ دروستکردنی فڕۆکەخانەی موسڵ بکەین”.
یەڵدز لە تویتەری خۆی نووسیوێتی: “لە داهاتوودا چاوەڕێدەکرێت دیزاینی فڕۆکەخانەکە بدرێتە چەند کۆمپانیایەکی تورکی و دەست بە بنیاتنانی بکرێت”.
لە پرۆژەیاسای بودجەی ساڵی داهاتووی عێراقدا پارە بۆ دروستکردنی فڕۆکەخانەیەکی هاوچەرخ دیاریکراوە لە شاری موسڵ کە دوای تێکشکانی داعش شارەکە رووبەڕووی کاولکاریی بووەتەوە.
