راگرتنی گەشت لەگەڵ ئێران تا 20ی نيسان درێژکرايەوە

SNN

هەردوو دەروازەی نێودەوڵەتی باشماخ و حاجی ئۆمەران رايانگەياند: “ماوەی راگرتنی گەشتەکانيان لەگەڵ وڵاتی ئێراندا کە برياربوو ئەمڕۆ دەستپێبکاتەوە تا دوو هەفتەيديکە راگيراوە”.

ئیسماعیل عەلی ئاغا بەڕێوەبەری راگەیاندن و پەیوەندیەکانی دەروازەی نێودەوڵەتی باشماخ لە لێدوانێکيدا رایگەیاندووە:”بەبڕیاری لیژنەی باڵای رووبەڕووبوونەوەی کۆرۆنا لە وڵاتی ئێران لەئەمڕۆوە تا 20ی ئەم مانگە قەدەغەی گەشتکردن بۆ هاوڵاتیانی عێراق درێژکراوەتەوە و ناتوانن هاتوچۆ بکەن”.

وتيشی “بڕیارەکە لەلایەن ئێرانەوە دەرچووە و لەرێگەی پارێزگای سنەوە ئاگادارکراونەتەوە کە بۆ ماوەی 14 رۆژی دیکەش قەدەغەی گەشتکردن درێژکراوەتەوە”.

هاوکات، سیروان حسێن وتەبێژی دەروازەی نێودەوڵەتی حاجی ئۆمەران ئاماژەی بەوەکردووە: “دوای تەواوبوونی ئەو وادەیەی دیاریکرابوو، لەلایەن ئێران بۆ داخستنی دەروازەی سنووری نێودەڵەتی حاجی ئۆمەران لە رووی گەشتیاری بەهۆی تەشەنەکردنی ڤایرۆسی کۆرۆنا ئەمڕۆ لەلایەن بەرپرسانی ئێرانی لە دروازەی تەمەرچین ئاگادار کراونەتەوە  کە ئێران بۆ ماوەی دوو هەفتەی دیکە دەروازەکە بە رووی گەشتیاران دادەخات”.