نەتەوەیەکگرتووەکان: داعش چەکی کیمیایی لەسەر زیندانیکراوی عێراقی تاقیکردووەتەوە
هێرشی داعش
SNN
نەتەوەیەکگرتووەکان رایدەگەیەنێت داعش لە ساڵانی رابردوودا چەکی کیمیایی دژ بە هاووڵاتیانی عێراقی بەکارهێناوە، هەروەها چەکی کیمیایی لەسەر زیندانیکراوانی عێراقیش تاقیکردووەتەوە.
رێکخراوی یونیتایدی سەر بە نەتەوەیەکگرتووەکان لە راپۆرتێکیدا کە لەسەر بنەمای بەڵگەی تاوانەکانی داعش نوسیویەتی باس لەوەدەکات چەکدارانی داعش چەکی کیمیایی و بایۆلۆجییان لە عێراق بەکارهێناوە ئەوەش لەنێوان ساڵانی 2014 بۆ 2016دا.
لە لێکۆڵینەوەکەدا باس لەوە دەكەن كە ڕێكخراوی تیرۆریستیی داعش چەكی كیمیاوی لەسەر بەندكراوە عێراقیەكان تاقیكردۆتەوە بۆ زانینی ئاستی كاریگەریی ئەو چەكانە.
ئاماژە بەوەشدراوە: “بەهۆی دەرخستنی ئەو راستیەی کە چەکدارانی داعش چەکی کیمیاییان بەکارهێناوە لەگەڵ وردەکاری چۆنیەتی بەکارهێنانی ئەو چەکانە، وادەکات دەستگیرکراوانی داعش رووبەڕووی تاوانەکانی جەنگ و تاوانی دژ بە مرۆڤایەتی و جینۆساید ببنەوە”.
رێکخراوی یونیتاید لەژێر فشاری ئەمەل کلونی پارێزەری نادیە موراد و ژمارەیەکی دیکە لە قوربانیانی دەستی داعش، لەساڵی 2017 پێکهێندراوە بە مەبەستی لێکۆڵینەوەکردن لە تاوانەکانی دەستی داعش و بەسزاگەیاندنی چەکدارانی ئەو رێکخراوە.
