لە سێ رۆژی جەژندا 70 هەزار گەشتیار روویان لە هەڵەبجە و هەورامان کردووە

SNN

بەڕێوەبەرایەتی گەشت و گوزار هەڵەبجە رايگەياند: “لە سێ رۆژی جەژنی رەمەزاندا 70 بۆ 75 هەزار گەشتیار روویان لە پارێزگای هەڵەبجە کردووە کە بەشێکی زۆریان گەشتیاری ناوەڕاست و باشوری عیراق بوون”.

غەریب ئەحمەد بەڕێوەبەری گەشت و گوزاری هەڵەبجە لە لێدوانێکدا بە دەنگی ئەمەریکای راگەیاندووە: ” لە سێ رۆژی جەژندا لە سنووری پارێزگای هەڵەبجە و هەورامان 70-75 هەزار گەشتیار سەردانی ناوچە گەشتیاریەکانیان کردووە و لە رێگەی سێ تیمی بەڕێوبەرایەتیەکەمانەوە ئاماری وورد کراوە و زۆرترین گەشتیاریش رووی لە هاوینە هەواری ئەحمەد ئاوا کردووە”.

لەگەڵ هاتنی رێژەیەکی زۆری گەشتیار و تێکەڵاوی بەهوی جەژنەوە لەلایەن هاووڵاتیانەوە لە ماوەی سێ رۆژی جەژندا بە وتەی د. شوان عومەر بەڕێوبەری نەخۆشخانەی وەفا: “850 پشکنین ئەنجامدراوە و 45 هاووڵاتی تووشی ڤایرۆسەکەبوون و هاووڵاتیەکیش بە ڤایرۆسەکە گیانیلەدەستداوە.”

هاوکات، موقدەم بەرزان عوسمان وتەبێژی بەڕێوةبەرایەتی پۆلیسی هەڵەبجە لە کۆنگرەیەکی رۆژنامەوانیدا رایگەیاند: “14 دۆسیەی لیکۆڵینەوە تۆمار کراوە و لەگەڵ هاتنی گەشتیارێکی زۆر هیچ حاڵەتێکی شەڕ و مردن و رووداوی هاتووچۆ لە ناوچە گەشتیاریەکان تۆمارنەکراوە”.