دانوستانەکانی پرسی ناوەکی ئەمریکا و ئێران لە کۆتا قۆناغدایە
SNN
وەزیری دەرەوەی چین رایگەیاند دانوستانەکانی ڤیەنای نێوان ئەمریکا و ئێران سەبارەت بە گەڕانەوە بۆ رێککەوتنی ناوەکی ئێران، گەیشتووەتە کۆتا قۆناغ.
وانگ یی وەزیری دەرەوەی چین لە کۆنگرەی داماڵینی چەکی ناوەکی، باسی لەوەکرد کە دەبێت لایەنەکانی پەیوەست بە رێککەوتنی ناوەکی ئێران هەوڵە دیپلۆماسییەکانیان بخەنەگەڕ بۆ زیندووکردنەوەی رێککەوتنەکە.
ماوەی چەندین مانگە لە ڤیەنا، دانوستانی ئەمریکا و ئێران سەبارەت بە گەڕانەوەی ئەمریکا بۆ رێککەوتنی ناوەکی ئێران بەڕێوەدەچێت، ئێران مەرجی بۆ پابەندبوونەوە بە رێککەوتنەکە ئەوەیە کە ئەمریکا سزاکانی سەر ئێران هەڵبگرێت.
دوێنێ ئەمریکا سزای سەر سێ بەرپرس و دوو کۆمپانیای ئێرانی هەڵگرت کە لە کەرتی نەوتی ئێراندا کاردەکەن.
هاوکات ئەنتۆنی بلینکن وەزیری دەرەوەی ئەمریکا رایگەیاندووە کە ئەمریکا ئەو سزایانەی سەر ئێران هەڵناگرێت کە پەیوەندی بە پشتیوانی ئێرانەوەیە بۆ تیرۆر لە ناوچەکەدا.
