240 گەشتیار و کۆچبەر لە بێلاڕوسیاوە دەگەڕێندرێنەوە

SNN

ئەمڕۆ سێشەممە 240 گەشتیار و کۆچبەری خەڵکی هەرێمی کوردستان و ناوچەکانی عێراق لە بێلاڕوسیاوە دەگەڕێندرێنەوە بۆ بەغدا.

ئەحمەد سەحاف وتەبێژی وەزارەتی دەرەوەی عێراق ئەمڕۆ لە راگەیەندراوێکدا وتی: گەشتێکی ئاسمانی تایبەت رێکخراوە بۆ ئەو هاووڵاتییە عێراقیانەی کە لە بێلاڕوسیا و سنوورەکانی نێوان ئەو وڵاتە و لیتوانیا گیریانخواردووە، ئەو کەسانە ژمارەیان 240 کەسە کە لە رێگەی هێڵی ئاسمانی عێراقییەوە دەگەڕێندرێنەوە بۆ فڕۆکەخانەی نێودەوڵەتی بەغدا.

ناوبراو باسی لەوەکرد لەگەڵ دیبلۆماتکارانی بێلاڕوسیادا هەماهەنگی دروستکراوە بەمەبەستی گەڕاندنەوەی ئەو گەشتیار و کۆچبەرانە.

لەوبارەیەوە لیناس لینکێڤیوس وەزیری دەرەوەی لیتوانیا وتوویەتی ئەم شەپۆلەی کۆچبەران لەنێوان بێلاڕوسیا و لیتوانیا پرسێکی سیاسی بوو لەنێوان بێلاڕوسیا و ئەوروپادا و کاردانەوەی بێلاڕوسیابوو لەبەرامبەر ئەو سزایەی ئەوروپا خستبوویەسەر، بێلاڕوسیا دەیوست لە تۆڵەی ئەوەدا توندوتیژی و تاوانکاری لە ئەوروپا بڵاوبکاتەوە.