سەرۆکوەزیرانی کەنەدا بەردباران کرا

SNN

جەستن ترودۆو سەرۆکوەزیرانی کەنەدا لە کۆبوونەوەیەکی جەماوەریدا کە بۆ بانگەشەی هەڵبژاردن رێکیخستبوو، لەلایەن ژمارەیەک خۆپیشاندەرەوە بە بەردی بچووک بەردباران کرا.

بەهۆی بەردبارانکردنییەوە ترودۆو گەڕایەوە ناو پاسەکە، هیچ زیانێکی گیانی پێنەگەیشتبوو، بەڵام بەهۆی رووداوەکەوە کۆبوونەوە جەماوەرییەکەی کۆتایی پێهێنا.

خۆپیشاندەران دژی ئەو رێکارە تەندروستییانە گردبوونەوەیان ئەنجامدابوو کە وڵاتەکە جێبەجێی دەکات، بەتایبەت بڕیاری وەرگرتنی ڤاکسین کە لە وڵاتەکەدا کراوەتە ناچاری.

لەدوای هێوربوونەوەی بارودۆخەکە سەرۆکوەزیرانی کەنەدا بە میدیاکانی وت: “چەند بەردێکی بچووک بەر شانم کەوتووە، ئەوە هاوشێوەی رووداوێکبوو کە ساڵی 2016 لەلایەن ژنێکەوە ناوکە کولەکەم تێگیرا”.

ترودۆو وتیشی: “توندوتیژی لە سیاسەتدا هەرگیز جێگەی قبوڵ نییە و دەبێت میدیا لە ترس و توندوتیژی و هەراسانکردنەوە تێوەنەگلێت”.

بڕیارە 20ی ئەیلول هەڵبژاردنی گشتی لە کەنەدا بەڕێوەبچێت و ناچارکردنی هاووڵاتیان بە وەرگرتنی ڤاکسینی دژ بە کۆرۆنا یەکێکە لە پرسە گەرمەکانی هەڵبژاردنەکە کە هەندێک کەس پشتگیری لێناکات.