ئيتاڵيا 100 هەزار ڤاکسينی پێشکەش بە عێراق کرد

SNN

حکوومەتی ئیتاڵیا لە چوارچێوەی پرۆگرامی کۆڤاکس 100 ھەزار دۆز ڤاکسینی کۆرۆنای پێشکەش بە وەزارەتی تەندروستیی و ژینگەی عێراق کرد.

وەزارەتی تەندروستیی و ژینگەی عێراق لە راگەیەندراوێکدا ئاماژەی بەوەکرد: “کاروانێکی ڤاکسینی کۆرۆنا کە 100 ھەزار دۆزە، لەلایەن حکومەتی ئیتاڵیاوە بە ھاماھەنگیی لەگەڵ رێکخراوی تەندروستیی جیھانیی لە چوارچێوەی کۆڤاکس بە ئامانجی پاڵپشتیی کردن لە ھەوڵەکان بۆ بەرەنگاربوونەوەی ڤایرۆسی کۆرۆنای نوێ، پێشکەش بە حکوومەتی عێراق کراوە”.

بەپێی راگەیەندراوەکە ئەو بڕە ڤاکسينە لە رێورەسمێکدا بە ئامادەبوونی برونۆ ئەنتۆنیۆ باسکۆینۆ باڵیۆزی ئیتاڵیا لە بەغدا، رادەستی وەزارەتی تەندروستیی و ژینگەی عێراق کراوە.

ئەمەش لە کاتێکدایە تا ئێستا، چوار ملیۆن و 64 ھەزار و 600 کەس لە عێراق، دۆزی یەکەم و دووەمی ڤاکسینی کۆرۆنایان وەرگرتووە.