سەید شوهەدا: هێزی ئەمریکا نەکشاوەتەوە و فریومان دەدەن

SNN

کەتائیبی سەید شوهەدا ئەمڕۆ ئەوەی خستەڕوو: “هێزەکانی ئەمریکا نەکشاونەتەوە لە عێراق و باسکردن لە کشانەوەشی بۆ فریودانە”.

کازم فەرتوسی وتەبێژی ئەو ملیشیایەی حەشدی شەعبی ئەوەی راگەیاندووە: “بەداخەوە کە حکومەتی عێراق بووەتە نێوەندگر لە نێوان گەل و هێزی داگیرکەردا، ئەمریکا تا ئێستا هێزەکانی نەکشاندووەتەوە و هیچ راگەیەندراوێکی لەوبارەیەوە نەبووە”.

فەرتوسی کشانەوەی هێزەکانی ئەمریکای بە “فێڵی چاو” ناوبرد و وتیشی: هەموان پرسیار دەکەن لە چۆنیەتی کشانەوەی هێزەکانی ئەمریکا و چارەنووسی ئەو هێزانە”.

سەبارەت بەوەی کە دەوترێت هێزە شەڕکەرەکان کشاونەتەوە و ئەوەی ماوە تەنیا هێزی راوێژکارییە، ئەو وتەبێژە وتی: “گۆڕینی ناوەکان فریومان نادات و ئەزموونی ئەمریکا لە هیچ لایەکەوە سوودی بۆ عێراق نابێت”.

ئەم قسانەی وتەبێژی سەید شوهەدا لەکاتێکدایە کە لە چەند رۆژی رابردوودا مستەفا کازمی رایگەیاند کە تەواوی هێزە شەڕکەرەکانی ئەمریکا لە عێراق کشاونەتەوە، ئەمە بەگوێرەی رێککەوتنێکی پێشووتری نێوان بەغدا و واشنتن.

کشانەوەی هێزەکانی ئەمریکا پرسێکی هەستیارە بەتایبەت لەلای ئەو ملیشیایانەی حەشدی شەعبی کە خۆیان بە نەیاری سەرسەختی ئەمریکا دەزانن و لە رابردوودا هۆشدارییانداوە لە هێرشکردنەسەر بەرژەوەندییەکانی ئەمریکا لە ئەگەری نەکشانەوەی هێزەکاندا.