نوێترین زانیاری لە بارەی خەرجكردنی دەرماڵەی هێزەكانی 70 و 80ی پێشمەرگە

SNN-عەلی حەمەسەعید
دوای ئەوەی ماوەی چەد ڕۆژێكە لە چەند دەزگایەكی ڕاگەیاندن و هەروەها سۆشیال میديا ئەوە بڵاودەكرێتەوە كە لە مانگی داهاتووەوە دەرماڵەی هێزەكانی 70 و 80ی سەربە وەزارەتی پێشمەرگەی هەرێم خەرجدەكرێت، بەڵام بەرپرسێكی وەزارەتی پێشمەرگە ئەو دەنگۆیانە ڕەتدەكاتەوە و جەختیش دەكاتەوە كە هەوڵەكانیان بۆ خەرجكردنی ئەو دەرماڵانە بەردەوامییان هەیە.

بە گوێرەی ئەو زانیارییانەی كە لە بەرپرسێكی سەربە وەزارەتی پێشمەرگە بە SNN دراون ئەوەخراوەتەڕوو: ماوەی چەند ڕۆژێكە لەدەزگاكانی ڕاگەیاندن و سۆشیال میدیاوە باس لە خەرجكردنی دەرماڵەی هێزەكانی 70و 80ی هێزەكانی پێشمەرگە دەكرێت كە گوایە لە مانگی داهاتووەوە دەرماڵەكانیان بۆ خەرجدەكرێت، بەڵام تا ئێستا لەلایەن وەزارەتی داراییەوە وەزارەتی پێشمەرگە ئاگادار نەكراوەتەوە.

ئاماژەی بەوەشكرد: بەدڵنیاییەوە وەزیری پێشمەرگە، تەواوی هەوڵەكانی خۆی خستۆتە گەڕ بۆ خەرجكردنی دەرماڵەی هێزەكانی پێشمەرگە بەتایبەت یەكەكانی 70 و 80 بۆیە هەر فەرمانێكی وەزیری پێشمەرگە، لەبارەی سەرفكردنی دەرماڵەی ئەو دوویەكەی هێزی پێشمەرگەوە هەبێت لەچەند رۆژی داهاتوو بڵاوی دەكەینەوە.

بەگوێرەی بەدواداچوونەكانی SNNلە ئێستادا تەنها هێزەكانی زێرەڤانی و بەرگری و فریاكەوتن دەرماڵەیان هاوتای هاوپیشەكانیانە لە وەزارەتی بەرگری عێراق و خراونەتە سەر وەزارەتی ناوخۆ، بەڵام هێزەكانی دیكەی وەزارەتی پێشمەرگە سەرجەمیان دەرماڵەكانیان بۆ خەرج ناكرێت.