بافڵ جەلال تاڵەبانی: یەکڕیزی و یەکدەنگی کورد بەرامبەر داگیرکەران خەمی گەورەی مامۆستا ئیبراهیم ئەحمەد بوو

SNN

بافڵ جەلال تاڵەبانی لە پەیامێکدا رایگەیاند: “ئەمڕۆ 22 ساڵ بەسەر کۆچی دوایی مامۆستای سیاسەت و کوردایەتی، رۆشنبیری و رۆژنامەگەری، مامۆستا ئیبراهیم ئەحمەد تێدەپەڕێت.

باسی لەوەشکردووە: “مامۆستا ئیبراهیم ئەحمەد یەکێک بوو لە سیمبولەکانی سیاسەت، رێبەری خەبات و تێکۆشان لە سەدەی رابردوودا و بەو بیرە نەتەوەییەوە کە هەیبوو، هەموو ژیانی بۆ خەبات دژی زوڵم و ستەم تەرخانکرد. ئەمەش نەک هەر لە کاری سیاسیدا، بەڵکو لە بەرهەمە ئەدەبی و رۆژنامەوانییەکانیدا بە ئاشکرا دیارە”.

راشیگەیاندووە: “یەکڕیزی و یەکدەنگی کورد بەرامبەر داگیرکەران و هەبوونی گوتارێکی نەتەوەیی و نیشتمانیی لەنێوان هێزە سیاسییەکاندا خەمی گەورەی مامۆستا ئیبراهیم ئەحمەد بوو. هەمیشە بڕوای بەوە هەبووە کە سەرکەوتنی کورد پەیوەستە بە یەکگرتوویی و یەکڕیزی ناوماڵی کوردەوە، بۆ ئەمەش هەوڵی زۆری داوە و مێژوو شاهیدی دڵسۆزی و خەمخۆری بۆ مامۆستا ئیبراهیم دەدات بەرامبەر سەربەرزی و سەرفرازی خەڵکی کوردستان”.

بافڵ جەلال تاڵەبانی ئاماژەی بەوەشکردووە: “ئەوکاتەی مامۆستا ئیبراهیم ئەحمەد سکرتێری پارتی دیموکراتی کوردستان بوو، خەباتی سیاسی گۆڕانکاری و نوێگەری بەسەردا هات و بناغەیەکی نوێی بۆ خەبات و کاری سیاسی دانا. ئەمەش کاریگەرییەکی بەرچاوی هەبوو لە سیاسەتی پارتی دیموکراتی کوردستان و شێوازی کارکردنیدا. ئەوانەی رابردوو لەیاد ناکەن و مێژوو وەک خۆی دەگێڕنەوە، ئەم راستییە باش دەزانن”.

لە کۆتاییشدا رایگەیاندووە: “ئێمە خەبات و تێکۆشانی مامۆستا ئیبراهیم ئەحمەد لەیاد ناکەین. بە سوودوەرگرتن لەو میراتە سیاسی و رۆشنبیرییەی مامۆستا بۆ ئێمەی جێهێشتووە درێژە بە خەبات دەدەین و بە ئومێدەوە بۆ داهاتوو دەڕوانین. ئەمەش ئەرک و بەرپرسارێتی ئێمەیە بەرامبەر نەتەوەکەمان و وەفاداریمان بۆ مامۆستا ئیبراهیم ئەحمەد”.