ژووری بازرگانی سلێمانی داوادەکات مارکێتەکان له جهژندا کراوەبن
هاووڵاتیهك لهنێو ماركێتێكدا له عێراق | فۆتۆ: MEO
ژووری بازرگانی و پیشەسازی سلێمانی داوا دەکات مارکێت و دوکانەکان بەکراوەی بمێننەوە، سهرۆكى ئهو ژوورهش دهڵێت: ” راگرتنی هاتووچۆ و داخستنی بازاڕ و مارکێتەکان بۆتەهۆی دڵەڕاوکێ لەناو هاووڵاتیان”.
سیروان محەمەد، سەرۆکی ژووری بازرگانی و پیشەسازی سلێمانی رایگەیاند: “ئێمە پێمان باشە مارکێتەکان و دوکانەکانی ناو گەڕەکەکان لە رۆژانی جەژندا بەکراوەی بمێننەوە، تەنیا لە یەکەم رۆژی جەژندا دابخرێن و لەدووەم رۆژەوە بکرێنەوە و هاووڵاتیان سودیان لێ وەربگرن”.
وتیشى: “بڕیاری 72 کاتژمێر راگرتنی هاتووچۆ و داخستنی بازاڕ و مارکێتەکان بووهتەهۆكاری دڵەڕاوکێ لەناو هاووڵاتیان، لەناو بازاڕ و مارکێتەکاندا خۆراک و پێداویستی زۆر دەکڕن و لەماڵەکانیاندا هەڵیدەگرن، ئەمەش مەترسی خراپبون و بەسەرچوونی لەسەرە هاووڵاتیان توشی زیانی زۆردەبن، دەبێتە هۆی وەستانی بازاڕ لەناو هەرێمی کوردستان”.
سەرۆکی ژووری بازرگانی و پیشەسازی سلێمانی ئهوهشدهخاتهڕوو: “دەروازە سنووریە نێودەوڵەتیەکان بەردەوام کاری بازرگانی تێدا دەکرێت، هاوردەکردنی خۆراک و کاڵا پێویستەکان بۆ ناو هەرێمی کوردستان بەردەوامی هەیە و هیچ گرفتێکمان لە خاڵە سنووریەکان نییە”.
سیروان محەمەد داوادەکات، “لایەنە پەیوەندیدارەکان مارکێت و دوکانەکانه ناو گەڕەکەکان پابەندبکەن بە ڕێنماییەکان و خۆپارێزی تەواو لە دووەم رۆژی جەژنەوە بکرێنەوە تا هاووڵاتیان ئەوەندە خۆراک و پێداویستی نەکڕن و زیانی زۆریان بەرکەوێت تەنیا رۆژانە پێداویستیەکانیان بکڕن”.
