“یەكلایی كردنەوەی سكاڵاكەی دادگای فەرەنسا كاریگەری خراپی لەسەر مووچەخۆرانی هەرێم دەبێت”

SNN-عەلی حەمە سەعید
شارەزایەكی بواری دارایی و ئابووری ئاماژە بەوەدەكات یەكلایی كردنەوەی سكاڵاكەی دادگای فەرەنسا لەبارەی فرۆشتنی نەوتی هەرێم لەڕێگەی توركیاوە كاریگەری خراپ جێدەهێڵێت لەڕووی مووچەی فەرمانبەران و هەروەها دۆخی دارایی لە هەرێمی كوردستان بە تایبەت ئەگەر توركیا ئامادە نەبێت بچێتە ژێرباری ئەو قەرەبووەی بدرێت بە عێراق كە بڕی 25 ملیار دۆلارە.

شیروان میرزا، ئەندامی لیژنەی دارایی لە خولی پێشووی پەرلەمانی عێراق و شارەزا لەكاروباری دارایی بە SNNی ڕاگەیاند: ئەو سكاڵایەی عێراق لە دادگای پاریس تۆماری كردوزوە لە دژی توركیایە، چونكە ئەو ڕێككەوتنەی لەنێوان توركیا و عێراق كراوە بۆ فرۆرشتنی نەوتی عێراقە لەڕێگەی بۆری نێوان عێراق توركیا، بەڵام توركیا پێشێلی ئەو ڕێككەوتنەی كردووە و نەوتی هەرێمی كوردستانی بەو بۆرییە فرۆرشتووە لەكاتیكدا تەهها عێراق مافی هەیە نەوت بەو بۆرییەدا بفرۆشێت و توركیاش ئەمنیەتی ئەو بۆرییە بپارێزێت.

ئاماژەی بەوەشكرد، لە ئێستادا ئەنجامی ئەو سكاڵایە ئەوەیە كە لە %100 لەبەرژەوەندی عێراق یەكلایی بووەتەوە دەبێت توركیا بڕی 25 ملیار دۆلار قەرەبووی عێراق بكاتەوە، بەڵام بابەتەكە لێرەدایە ئایا توركیا دەچێتە ژێرباری دانەوەی ئەو قەرەبووە بە عێراق یان هەرێمی كوردستان ناچار دەكات بە پێبژاردنی ئەو قەرەبووە، كە بەدڵنیاییەوە پێناچێت توركیا ئامادە بێت بچێتە ژێرباری ئەو پارە زۆرەوە.

ئەو شارەزایەی بواری دارایی و ئابووری ئەوەشی خستەڕوو، یەكلایی كردنەوەی ئەم دۆسیەیە لەبەرژەوەندی عێراق كاریگەری زۆر خراپ بەسەر ئابوری هەرێم و هەروەها فەرمانبەرانی كوردستان جێدەهێڵێت، چونكە لەلایەك فرۆشتنی نەوتی هەرێم لەرێگەی ئەو بۆرییەوە گرفتی سەرەكی بۆ دروستدەبێت، لەلایەكی دیكەشەوە هەرێم دەخاتە ژێر باری پێدانەوەی بڕە پارەیەكی زۆر كە لە توانایدا نییە دواجار دەبێت هاووڵاتیان و فەرمانبەران باجی ئەم هەڵانە بدەن.