گومرگی هەرێم: هاوردەکردنی خواردنەوە کحولييەکان لە هەرێم قەدەغە نەکراوە

SNN-عەلی حەمەسەعید

بەڕێوەبەری گشتیی گومرگی هەرێمی كوردستان ئاماژە بەوەدەكات: تا ئێستا ئەو بڕیارەمان بەفەرمی بەدەست نەگەیشتووە کە هاوردەکردنی خواردنەوە کحولييەکان قەدەغەبکرێت، هەركات ئەنجومەنی وەزیرانی هەرێم پەسەندی كرد پاشان ئێمە جێبەجێی دەكەین.

ساماڵ عەبدولڕەحمان، بەڕێوەبەری گومرگی هەرێم بەSNN ی ڕاگەیاند: تا ئێستا بڕیاری قەدەغەكردنی هاوردەكردن و فرۆشتن و خواردنەوەی مادە كحولییەكانمان بەدەست نەگەیشتووە كە لەلایەن حكومەتی عێراقییەوە دەرچووە، هەركاتیش بەدەستمان بگات دەبێت ئەنجومەنی وەزیرانی هەرێم پەسەندی بكات پاشان ئێمە كاری پێدەكەین.

ئاماژەی بەوەشكرد:هەر بڕیارێك كە پەیوەندی بە گومرگی هەرێمەوە هەبێت و لەلایەن حكومەتی عێراقییەوە دەربچێت، دەبێت نوسراوەكەی بگات بەدەستی ئێمە پاشان ئەنجومەنی وەزیرانی هەرێم پەسەندی بكات یاخود ڕەتی بكاتەوە دواتر ئێمە لەسەر بڕیارەكەی ئەنجومەنی وەزیرانی هەرێم كار دەكەین.

وتەكانی بەڕێوەبەری گشتی گومرگی هەرێم لەكاتێكدایە كە چەند ڕۆژێكە دەستەی گشتیی گومرگی عێراق بڕیاریدا هاوردەكردنی خواردنەوە كحولییەكان بە هەموو جۆرەكانیەوە قەدەغە بكات، بە پێی یاساكەش هاوردەكردن و دروستكردن و فرۆشتنی خواردنەوە كحولییەكان بە هەموو جۆرەكانیەوە قەدەغە دەكرێت، هەركەسێكیش  پێچەوانەی ئەو یاسەیە كاربكات سزای دارایی دیاریكراوە كە لە 10 ملیۆن دینار كەمتر نەبێت و لە 25 ملیۆن دیناریش زیاتر نەبێت.