وەزیری ژینگەی عێراق: بانکی نێودەوڵەتی ھاوکار دەبێت لە تێپەڕاندنی کاریگەرییەکانی کەشوھەوای عێراق
وەزیری ژینگەی عێراق، لە چوارچێوەی بەشداریکردنی لە کۆبوونەوەی ساڵانەی بانکی نێودەوڵەتی لە واشتن، بۆ رووبەڕووبوونەوەی کاریگەرییەکانی کەشوھەوا و گرتنەبەری ڕێوشوێن و چارەسەر بۆ تێپەڕاندنی مەترسییەکانی گۆڕانی کەشوھەوا راپۆرتێکی خستەڕوو، و رایگەیاند، بانکی نێودەوڵەتی پێداویستییەکانی پەیوەست بە ئاڵنگارییەکانی گۆرانی کەشوھەوای عێراق دابین دەکات.
نزار ئامێدی رایگەیاند، لە چوارچێوەی بەشداریکردنی لە کۆبوونەوەی ساڵانەی بانکی نێودەوڵەتی کە لە 11 تا 14ی نیسان لە واشنتن بەڕێوەدەچێت، ھاوکارییەکانی بانکی نێودەوڵەتی بۆ عێراق پێداچوونەوەی بۆ کراوە.
ئاماژەی بەوەشکرد،حکومەتی عێراق ھەنگاوی جددی دەگرێتەبەر بۆ رووبەڕووبوونەوەی کاریگەرییەکانی گۆڕانی کەشوھەوا، کە ھەڕەشە لە ھەموو جیھان دەکات نەک تەنیا عێراق.
وەزیری ژینگەی عێراق ئاماژەی بەوەشکردووە، بانکی نێودەوڵەتی ڕاپۆرتی کەشوھەوا و گەشەپێدانی عێراقی خستوەتەڕوو تا ببێتە بنەمایەکی شیکاری بۆ دابینکردنی پێداویستی بەپەلە بۆ گەشەپێدان و رووبەرووبوونەوەی کاریگەرییەکانی کەشوھەوا و گرتنەبەری ڕێوشوێن و چارەسەر بۆ تێپەڕاندنی مەترسییەکانی گۆڕانی کەشوھەوا.
