” دووساڵە وەزیری كشتوكاڵ هاوردەكردنی مریشكی بەستووی قەدەغە كردووە، بەڵام جێبەجێناكرێت”

SNN-عەلی حەمەسەعید

سەرۆكی كۆمەڵەی كێڵگە پەلەوەریەكانی پارێزگاكانی سلێمانی‌هەڵەبجە ئاماژەبەوەدەكات وەزیری كشتوكاڵ ماوەی دووساڵە بەبڕیارێك هاوردەكردنی مریشكی بەستوی لەدەرەوە قەدەغە كردووە، بەڵام هەندێك لایەن پابەند نابن بەو بڕیارەوەو بەردەوام مریشكی بەستوو هاوردە دەكرێت ئەوەش زیانی بەخاوەن كێڵگەپەلەوەرییەكان گەیاندووە.

نازم عەبدوڵا، سەرۆكی كۆمەڵەی كێڵگە پەلەوەریەكانی سلێمانی بە SNNی ڕایگەیاند: وەزیری كشتوكاڵ ماوەی زیاد لە دوو ساڵە هاوردە كردنی مریشكی بەستوی قەدەغە كردووە، بەڵام بەداخەوە هەندێك لایەنی پەیوەندیدار ئەوبڕیارە جێبەجێ ناكەن ‌و بەردەوام ڕۆژانە مریشكی بەستوو لەبازاڕەكانی شاروشارۆچكەكانی هەرێم دەفرۆشرێت، كە بەهای خۆراكی مریشكی بەستوو بەڕێژەی لە ٢٠% دەمێنێتەوە، لەكاتێكدا مریشكی زندوو لە ٩٥% بەهای خۆراكی دەمێنێتەوە، ئەمەش بوەتە هۆی زیانێكی زۆر بۆ خاوەن كێڵگە پەلەوەریەكانی كوردستان.

ئاماژەی بەوەشكرد، ئێمە بەردەوام جەخت دەكەینەوە لەسەر پاراستنی بەرهەمی ناوخۆیی‌و پشتیوانیكردن لەكەرتی بەرهەمهێنانی بەروبومە خۆماڵیەكان، بەو پێیەی پەلەوەر توانیویەتی پێداویستی ناوخۆیی بەزیادەوە پڕ بكاتەوە، بەڵام هەتا ئێستا پشتیوانیمان ناكرێت تا بتوانین بەردەوام بین‌و توشی زیانی زۆر نەبین بۆ بەردەوام بوونمان لەزیادكردنی بەرهەمی ناوخۆیی، لەئێستادا هەر كیلۆیەك مریشك لەناو هۆڵی كێڵگە پەلەوەریەكاندا بەدوو هەزارو 100 دینارە، بەڵام هەر كیلۆیەك سێ هەزار دینار لەسەر خاوەن پڕۆژە دەكەوێت كە هەر كیلۆیەك زەرەری هەزار دینارە بۆ خاوەن پڕۆژە.

سەرۆكی كۆمەڵەی كێڵگە پەلەوەرییەكان ئەوەشی خستەڕوو، لیژنەی كشتوكاڵی پەرلەمانی كوردستان داوای لەحكومەتی هەرێمی كوردستان كردووە، پێداچوونەوە بەهاوردەی مریشكی بەستوو بكەنەوەو ڕێگە نەدەن بەقاچاغ‌و بەبێ باج بهێنرێت، لەبەرئەوەی خاوەنی كێڵگە پەلەوەرییەكانی هەرێمی كوردستان لەزیانێكی گەورەدان، بەڵام حكومەتی هەرێم هەتا ئێستا هیچ جۆرە هاوكارییەكی نەكردوین، لەكاتێكدا ئێمە ئاسایشی خۆراكمان دروستكردووە.