هێڵی ئینتەرنێت دووبارە بۆ غەززە دەگەڕێتەوە

SNN
دوای ئەوەی بەهۆی هێرشەکانی ئیسرائیلەوە بۆ غەززە، بۆ ماوەی دوو رۆژ هێڵی ئینتەرنێت لەو شارەدا نەما، لە ئێستادا کۆمپانیای پەیوەندیکردن و گەیاندن دووبارە هێڵەکە چاک دەکەنەوە.

کۆمپانیای پالتێلی تایبەتبە پەیوەندی و گەیاندن لە فەلەستین رایگەیاندووە، سەرقاڵی چاککردنەوەی هێڵەکانی ئینتەرنێتن لە غەززە و هەنگاو بە هەنگاو هێڵەکانی ئینتەرنێت و پەیوەندیکردن بەردەست دەبنەوە.

ئەمە لە کاتێکدایە، 27ی تسرینییەکەمی 2023، نوسینگەی راگەیاندنی غەززە ئاشکرایکرد، هێڵی ئینتەرنێت و مۆبایل لە غەززە بڕاون،مانگی سوری نێودەوڵەتیش، بەهۆی نەمانی هێڵی ئینتەرنێت و مۆبایلەوە رایگەیاند، ئاگاداریی تیمەکانیان نین.

لەلایەکی ترەوە، 28ی تشرینی یەکەم، ئیلۆن مەسک، بەرێوەبەری جێبەجێکاری ستارلینک لە تۆڕی کۆمەڵایەتی ئێکس رایگەیاند، هاوکار دەبێت لە دابینکردنی ئینتەرنێت بۆ رێکخراوە مرۆییە نێودەوڵەتییەکان لە کەرتی غەززە.