“700 ملیار دینارەکە تەنها بەشی مووچە دەکات پێویستە بەغدا پارەی زیاتر بۆ هەرێم بنێرێت”

-SNN

بەگوێرەی شارەزایانی ئابوری، حکومەتی هەرێم پێویستی بە 940 ملیار دینارە بۆ بەرێوەبردنی کاروبارەکانی دامودەزگا حکومییەکان، لەکاتێکدا بەهۆی جیاوازی ژمارە و داتاکانەوە سەبارەت بە پێویستی پێدانی مووچە، جارێکی تر کێشە بۆ ناردنی 700 ملیارەکە دروست بووە، شارەزایەکی ئابوریش دەڵێت “700 ملیارەکە تەنها بەشی مووچە دەکات”.

فازڵ نەبی، شارەزای دارایی و بریکاری پێشووتری وەزارەتی دارایی عێراق، بە رۆژنامەی سەباحی راگەیاندووە، “حکومەتی فیدراڵی بە شێوەیەکی دروست شایستە داراییەکانی هەرێمی نەناردووە، دەبوو بە شێوەی پێشینە بینێرێت نەک قەرز، چونکە حکومەتی هەرێم پشکی لە بودجەی گشتی عێراقدا هەیە”.

ئاماژەی بەوەکردووە، ئەو 700 ملیارەی لە بەغداوە دێت تەنها بەشی مووچە دەکات، هەر بۆیە پێویستە بۆ پرۆژە و خەرجییەکانی تر حکومەتی فیدراڵی بڕە پارەی زیاتر بۆ هەرێم بنێرێت.

ئەوە لەکاتێکدایە حکومەتی هەرێم رایگەیاندووە، وابڕیاربوو هه‌فته‌ی رابردوو بڕی 700 ملیار دیناری ‎مووچه‌ی فه‌رمانبه‌رانی هه‌رێم لەلایەن بەغدادەوە بنێردرێت و دەست بە دابەشکردنی مووچە بکرێت، بەڵام جارێکی دیکە ناردنی ئەو بڕە پارەیە دواکەوت، بۆ ئەو مەبەستەش جارێکی تر شاندی هەرێم سەردانی بەغدا دەکەن.