ئێران رێگە چارەیەک بۆ کۆتایهاتنی ململانێکانی نێوان ئیسرائیل و فەلەستین دادەنێت

SNN

وەزارەتی دەرەوەی ئێران لە راگەیەنراوێکدا ئاشکرایانکردووە، بۆ کۆتایهاتنی ململانێکانی نێوان ئیسرائیل و فەلەستین ئەنجامدانی ریفراندۆمە لە فەلەستین، بەو جۆرە گرژی و ئاڵۆزییەکانی نێوانیان نامێنێت.

وەزارەتی دەرەوەی ئێران راگەیەنراوێکیان بڵاوکردووەتەوە و تیایدا ئاماژە بە پەیوەندیی تەلەفۆنی نێوان “ئەمیر حسێن عەبدوڵڵاهیان” وەزیری دەرەوەی ئێران و پۆڵ ریچارد گاڵاگیر وەزیری دەرەوەی ڤاتیكان دەکەن، لە پەیوەندییە تەلەفۆنییەکەدا وەزیری دەرەوەی ئێران وتوویەتی “ئێمە پێمانوایە پرسی فەلەستین دەبێت لە بنەڕەتدا چارەسەر بكرێت، ئەویش دەكرێت ریفراندۆمێكی گشتی بە هاوكاری لەگەڵ نەتەوە یەكگرتوەكان و بە بەشداریی هەموو دانیشتوانی رەسەنی فەلەستین، لەوانەش موسڵمانان، مەسیحییەكان و جولەكەكان، ئەنجام بدرێت”.

لە درێژەی پەیوەندییەکەدا، وەزیری دەرەوەی ئێران، بە وەزیری دەرەوەی ڤاتیكانی وتووە “تەنیا دوو رێگە بۆ چارەسەری تەنگژەكانی ئێستای فەلەستین هەیە، یەكەمیان راگرتنی شەڕ و چارەسەری سیاسیە كە پەیوەستە بە ئەنجامدانی ریفراندۆمێكی گشتیی هەموو خەڵکی فەلەستین بەشداربن، دووەمیش بەردەوامبوونی شەڕە كە دەبێتە هۆی فراوانبوونی ململانێكان و درێژەكێشانی ناکۆکی و تەنگژەکان”.