کۆمپانیای داناغاز: بەرهەمهێنانی غاز لە کێڵگەی غازی کۆرمۆر راگیرا

SNN-

کۆمپانیای دانە غاز ڕایگەیاند، بەهۆی هێرشەکەی شەوی رابردوو بۆ سەر کێڵگەی غازی کۆرمۆر بەرهەمهێنانی غاز لە کێڵگەکە ڕاگیراوە.

کۆمپانیای دانەغاز، دوای هێرشەکەی دوێنێ شەو ڕاگەیەندراوێکی بڵاوکردووەتەوە و دەڵێت: شەوی پێنجشەممە، 25ی کانوونی دووەمی 2024، یەکێک لە کۆگاکانی هەڵگرتنی غازی شل لە کێڵگەی کۆرمۆر کرایە ئامانج کە گومان دەکرێت لە رێگەی درۆنێکەوە بووبێت و هیچ زیانێکی گیانی نەبووە”.

راشیگەیاندووە، بۆ کۆنتڕۆڵکردنی ئەو ئاگرەی لە کێڵگەکەدا کەوتۆتەوە، پرۆسەی بەرهەمهێنانمان بە تەواوەتی وەستاندووە، و تیمەکانی بەگەڕخستن سەرقاڵی کارەکانیانن بۆئەوەی بتوانرێت لە زووترین کاتدا پرۆسەکە دەستپێبکەینەوە.

شەوی رابردوو هێرشکرایە سەر کێڵگەی کۆرمۆر لە سنووری قەزای چەمچەماڵ و بەهۆی هێرشەکەوە کۆگایەکی هەڵگرتنی سووتەمەنی گڕیگرت، وەزارەتی کارەباش لە راگەیەندراوێکدا بڵاویکردەوە کە كاتژمێر 10:22 خولەکی شەوی 25-01-2024، لە كێڵگەی غازی كۆرمۆر ئاگرێک کەوتووەتەوە، و لەپێناو سەلامەتیی کارمەندان و كێڵگەكە هەناردەكردنی غاز بۆ سەرجەم وێستگەكانی بەرهەمهێنانی كارەبا راگیرا و بووە هۆی كەمبوونەوەی زیاتر لە 2800 مێگاوات بەرهەمهێنانی كارەبا.