باڵیۆزی ئەمریکا لە عێراق: ئیدانەی هێرشەكەی سەر كێڵگەی كۆرمۆر دەكەین

SNN-
باڵیۆزی ئەمریکا لە عێراق سەرکۆنەی هێرشەکەی سەر کێڵگەی غازی کۆرمۆر دەکات و دەڵێت:” هێرشەکە ژێرخانی كێڵگه‌كه‌ی وێران کرد و لە ناوەڕاستی زستاندا ملیۆنان کەس بێ کارەبا بوون”.

ئەلینا رۆمانۆوسکی، باڵیۆزی ئەمریکا لە عێراق له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی (X) بڵاویکردووەتەوە، سه‌ركۆنه‌ی ئەو هێرشە دەکەم کە دوێنێ پێنجشه‌ممه‌ كرایه‌ سه‌ر كێڵگه‌ی غازی كۆرمۆر لە هەرێمی کوردستان، هێرشەکە ژێرخانی كێڵگه‌كه‌ی وێران کرد و لە ناوەڕاستی زستاندا ملیۆنان کەس بێ کارەبا بون.

باڵیۆزی ئەمریکا لە عێراق دەشڵێت:” لەگەڵ هاوبەشەکانمان لە عێراق و هەرێمی کوردستان وەستاوین بۆ پشتیوانیکردن لە سەروەری و ئاسایشی عێراق”.

شەوی رابردوو هێرشکرایە سەر کێڵگەی کۆرمۆر لە سنووری قەزای چەمچەماڵ و بەهۆی هێرشەکەوە کۆگایەکی هەڵگرتنی سووتەمەنی گڕیگرت، وەزارەتی کارەباش لە راگەیەندراوێکدا بڵاویکردەوە کە كاتژمێر 10:22 خولەکی شەوی 25-01-2024، لە كێڵگەی غازی كۆرمۆر ئاگرێک کەوتووەتەوە، و لەپێناو سەلامەتیی کارمەندان و كێڵگەكە هەناردەكردنی غاز بۆ سەرجەم وێستگەكانی بەرهەمهێنانی كارەبا راگیرا و بووە هۆی كەمبوونەوەی زیاتر لە 2800 مێگاوات بەرهەمهێنانی كارەبا.

کۆمپانیای دانا غازیش لە راگەیەندراوێکدا دەڵێت: بەهۆی هێرشەکەی شەوی رابردوو بۆ سەر کێڵگەی غازی کۆرمۆر بەرهەمهێنانی غاز لە کێڵگەکە ڕاگیراوە.