“ئاستى ئاوى ژێرزه‌وى له سلێمانى مه‌ترێك به‌رزبووه‌ته‌وه”
پڕۆژەی ئاوی سەرچنار له شارى سلێمانى | فۆتۆ: هەوراز ئەحمەد | SNN
SNN
شاره‌زایه‌كى بوارى ئاوى ژێرزه‌وى ئاشكرایده‌كات، ئه‌مساڵ به به‌راورد به ساڵى پار ئاستى ئاوى ژێرزه‌وى سلێمانى مه‌ترێك به‌رزبووه‌ته‌وه.
ئه‌مڕۆ چوارشه‌ممه 7ى كانونى دووه‌م، د. پێشڕه‌و محه‌مه‌د، شاره‌زاى بوارى ئاوى ژێرزه‌وى به SNNى راگه‌یاند، “ئاستى ئاوى ژێرزه‌وى كاتێك به‌رزده‌بێته‌وه كه باران به‌خوڕنه‌بێت، به‌ڵكو له‌سه‌رخۆ ببارێت، به‌شێوه‌یه‌كى زانستیش رێژه‌ى 85٪ى باراناو ناچێته‌وه ژێرزه‌وى، به‌ڵكو ده‌چێته ناو چۆم و رووباره‌كان و ته‌نیا 15٪ى ده‌چێته‌وه ژێرزه‌وى”.
له وه‌ڵامى ئه‌و پرسیاره‌ى، ئایا شه‌پۆله‌كانى بارانبارینى ئه‌مساڵ، تا چه‌ند ئاستى ئاوى ژێرزه‌ویان به‌رزكردووته‌وه؟ د. پێشڕه‌و محه‌مه‌د وتى: “ئه‌مساڵ به به‌راورد به ساڵى پار ئاستى ئاوى ژێرزه‌وى له پارێزگاى سلێمانى مه‌ترێك به‌رزبووه‌ته‌وه”.
