“عێراق رێگە نادات خاکەکەی بۆ هێرشکردنە سەر وڵاتانی دیکە بەکاربهێنرێت”

SNN

راوێژکاری ئاسایشی نەتەوەیی عێراق و ئەمینداری گشتی ئەنجومەنی ئاسایشی نەتەوەیی تورکیا لە ئەنقەرە کۆبوونەوە و پەیوەندییەکانی هەردوو وڵاتیان تاوتوێکرد، لە کۆبوونەوەکەدا راوێژکارەکەی عێراق وتوویەتی ” عێراق رێگەنادات خاکەکەی بۆ ھێرشکردنە سەر وڵاتانی دیکە بەکاربھێنرێت”.

ئەمڕۆ سێشەممە 5ی ئازار، نوسینگەی راگەیاندنی راوێژکاری ئاسایشی نەتەوەیی عێراق راگەیەنراوێکی بڵاوکردووەتەوە و تیایدا هاتووە، قاسم ئەعرەجی، راوێژکاری ئاسایشی نەتەوەیی و سەیفوڵا موفتی ئۆغلۆ ئەمینداری گشتی ئەنجومەنی ئاسایشی نەتەوەیی تورکیا، لە ئەنقەرە کۆبوونەتەوە و دوایین پێشھاتە سیاسی و ئەمنییەکان لەسەر ئاستی نێودەوڵەتی و ھەرێمی تاوتوێکراوە، باس لە رێگاکانی پتەوکردنی پەیوەندییەکانی ئەنقەرە و بەغدا کراوە لەسەرجەم ئاستەکاندا.

ئاماژە بەوەکراوە، لە کۆبوونەوەکەدا دۆسیەکانی ئاسایش و ئاو و رێکخستنی سنورەکان و بەرەنگاربوونەوەی تیرۆر و گۆڕینەوەی زانیاری تاوتوێکراوە و ھەردوولا دوپاتیانکردووەتەوە کە دەبێت ھاوکارییەکانی نێوان ھەردوو وڵات بەردەوامبێت بۆ بەدیھێنانی ئاسایش و سەقامگیری لەناوچەکەدا.

راوێژکارەکەی ئاسایشی نەتەوەیی عێراق جەختیکردووەتەوە، “عێراق رێگەنادات خاکەکەی بۆ ھێرشکردنە سەر وڵاتانی دیکە بەکاربھێنرێت بە تایبەت وڵاتانی دراوسێ.”