“شەپۆلێکی چڕی باران بەڕێوەیە، پێویستە ئامادەسازیی پێشوەختە بۆ لافاو بکرێت”

SNN

وەزارەتێکی حکومەتی هەرێم پێشبینی شەپۆلێکی بارانبارینی چڕ دەکات و داواکاریشە پێشوەختە ئامادەسازی بۆ رووبەڕووبوونەوەی مەترسییەکانی لافاو بکرێت.

لە راگەیەندراوێکدا وەزارەتی کشتوکاڵ و سەرچاوەکانی ئاو رایگەیاند: بەپێی پێشبینیەکانی کەشناسی (USGS)ی ئەمریکی کە لەڕێی وەزارەتی (سەرچاوەکانی ئاوی عێراق)وە پێمانگەیشتووە، هەروەها پێشبینیەکانی کەشناسی هەرێمی کوردستان، شەپۆلێکی چڕی باران بەڕێوەیە، بەتایبەت لەڕۆژانی  18 و 19ی ئەم مانگە زۆربەی ناوچەکان دەگرێتەوە”.

راشیگەیاندووە: پێویستە ئامادەسازیی پێشوەختە بۆ لافاو بکرێت، بۆ تێپەڕاندنی شەپۆلەکە بەسەلامەتی و پاراستنی سەروماڵی هاووڵاتیان و پڕۆژەکان.

وەزارەتی کشتوکاڵ و سەرچاوەکانی ئاو داواشی لەهاوڵاتیانی نیشتەجێی سنووری بەنداوەکان و کەنار چەم و ڕوبارەکان، کردووە لەهەر ئەگەرێکی بەرزبوونەوەی ئاستی ئاو ئاگاداربن و خۆیان بپارێزن.