عێراق دەتوانێت ئەو پارەیەی بۆ مووچەی هەرێمی کوردستانی ناردووە بلۆکی بکات؟

SNN-

ئەندامێکی لیژنەی دارایی پەرلەمانی عێراق رەتیدەکاتەوە ئەو پارەیەی بەغدا بۆ هەرێمی کوردستانی ناردووە بتوانێت بلۆکی بکات و دەشڵێت:” درەنگ دابەشکردنی مووچە کێشە بۆ ئامادەکردنی راپۆرتە داراییەکانی مووچەی مانگی ئازار دروست دەکات”.

نەرمین مەعروف، ئەندامی لیژنەی دارایی پەرلەمانی عێراق بە SNNی راگەیاند، ئەو پارەیەی بەغدا بۆ هەرێمی کوردستانی ناردووە ناتوانێت وەریبگرێتەوە یاخود بلۆکی بکات، چونکە ئەوە پارەی مووچەیە و مافی خەڵکی کوردستانە، مەسەلەی درەنگ دابەشکردنی ئەو مافە نادات بە بەغدا بۆئەوەی بیکشێنێتەوە یاخود بلۆکی بکات، بەڵام درەنگ دابەشکردنی کاریگەری دەبێت لەسەرئامادەکردنی راپۆرتە داراییەکان بۆ مووچەی مانگی ئازار”.

وتیشی:”هەرچەندە وەزارەتی دارایی عێراق رایگەیاند، بۆ مووچەی مانگی سێ تەنها لە رێگەی کارتی بانکییەوە مووچە دەدەن، بەڵام راپۆرتە داراییەکان گرنگە کە بەهەرشێوەیەک بێت ئامادەبکرێت، رەنگە دواکەوتنەکە تەنها کاریگەری لەسەر ئەو راپۆرتانە هەبێت ، ئەگەر نا حکومەتی عێراق ناتوانێت بلۆکی ئەو پارەیە بکات یاخود بیکشێنێتەوە”.

ئەوە لە کاتێکدایە ماوەی زیاتر لە نۆ رۆژە وەزارەتی دارایی عێراق زیاتر لە 600 ملیار دیناری ناردووە بۆ مووچەی فەرمانبەرانی حکومەتی هەرێمی کوردستان، بەڵام دوای تێپەڕبوونی 48 رۆژ بەسەر دابەشکردنی مووچەدا هێشتا حکومەتی هەرێم ئامادەنییە ئەو پارەیە دابەشبکات و دەڵێت، کورتهێنانی هەیە.

‌‌‌‌‌‌‌