سوپای ئیسرائیل کوژرانی یەکێک لە سەرکردە دیارەکانی حەماسی راگەیاند

SNN

وتەبێژی سوپای ئیسرائیل رایگەیاند، مەروان عیسا کە یەکێک لە سەرکردە دیارەکانی بزوتنەوەی حەماس، لە یەکێک لە هێرشەکانیاندا ناوبراو کوژراوە.

ئەمڕۆ چوارشەممە 27ی ئازار، دانیال ھاگاری، وتەبێژی سوپای ئیسرائیل رایگەیاند، دوو ھەفتە بەر لە ئێستا مەروان عیسا سەرکردەی دیاری بزووتنەوەی حەماس کە یەکێک بووە لەو کەسانەی بەشداری لە ھێرشەکەی 7ی ئۆکتۆبەردا کردووە،  لە کەمپی نەسیرات لە کەرتی غەززە کوژراوە.

هاوکات، عزەت رەشق، ئەندامی مەکتەبی سیاسی بزووتنەوەی حەماس سەبارەت بە وتەکانی وتەبێژەکەی سوپای ئیسرائیل ئاشکرایکردووە، متمانەیان بە راگەیەندراوەکەی ئیسرائیل نییە سەبارەت بە کوژرانی مەروان عیسا.

ئاماژەی بەوەکردووە، راگەیاندنی ھەواڵێکی لەم شێوەیە لەمکاتەدا بۆ پەردەپۆشکردنی ئەو قەیرانانەیە کە بنیامین ناتانیاھۆ، سەرۆک وەزیرانی ئیسرائیل رووبەرووی بووەتەوە، دەیەوێت بەو رێگەیە شکستی ئیسرائیل لە بەدیھێنانی ئامانجەکانی بشارێتەوە.