ماڵپەڕی شەفافیەت داهاتی هەفتەیەکی سلێمانی ئاشکراکرد

SNN

بەگوێرەی زانیارییەکانی ماڵەپەڕی شەفافیەت کە داهاتی هەفتەیەکی سلێمانی بڵاوکردووەتەوە و ئاشکرایکردووە، داهاتی ئەم هەفتەیە بەراورد بە هەفتەی رابردوو بۆ زیاتر لە نیوە کەمیکردووە.

ئەمڕۆ هەینی 29ی ئازار،م ماڵپەڕی شەفافیەت بۆ چاودێری و رێکخستنی داھاتە نانەوتییەکانی پارێزگاکانی سلێمانی و ھەڵەبجە و ھەردوو ئیدارەی راپەڕین و گەرمیان، داھاتی ئەم هەفتەیەی بڵاوکردەوە تیایدا هاتووە، لە 23ی ئازار تاوەکو 29ی ئازار، بڕی داهات چوار ملیار و 53 ملیۆن و 513 ھەزار و 787 دینار بووە.

هاوکات، لە داهاتی ئەم هەفتەیە بڕی چوار ملیار و 47 ملیۆن و 97 هەزار و 33 دینار بەشێوەی نەختینە بووە و شەش ملیۆن و 416 هەزار و 457 دیناری بەشێوەی چەک بووە.

بەگوێرەی داتاکانی ماڵپەڕی شەفافیەت، داهاتی ئەم هەفتەیەی سلێمانی بەراورد بە هەفتەی پێشوو بۆ زیاتر لە نیوە دابەزیوە بە جۆرێک لە 16 تاوەکو 24ی ئازار بڕی داهات هەشت ملیار و  909 ملیۆن 571 هەزار و 232 دینار بووە.

ماڵپەڕی شەفافیەت لە 15ی کانونی یەکەمی 2022 لەلایەن قوباد تاڵەبانی، جێگری سەرۆکوەزیرانی هەرێمی کوردستانەوە بۆ چاودێری و رێکخستنی داھاتە نانەوتییەکانی سنووری پارێزگاکانی سلێمانی و ھەڵەبجە و ھەردوو ئیدارەی راپەڕین و گەرمیان راگەیەندرا.