پلەکانی گەرما تا ئاستی 30 پلەی سلیزی بەرزدەبێتەوە

SNN

بەڕێوەبەرایەتی کەشناسی هەرێم رایگەیاند، کەشی پێشبینیکراوی 48 کاتژمێری داهاتوو ئاسمان ساماڵ دەبێت و پلەکانی گەرماش زیاتر بەرزدەبێتەوە، کەشناسی عێراقیش دەڵێت، ” لە چەند ناوچەیەکی خوارویی عێراق نمەباران دەبێت و پلەکانی گەرماش بۆ30 پلەی سلیزی بەرزدەبێتەوە”.

ئەمڕۆ شەممە، بەڕێوەبەرایەتی کەشناسی و بوومەلەرزەزانی هەرێم راگەیەندراوێكی بڵاوکردەوە و تێیدا هاتووە، کەش و هەوا بە گشتی لە نێوان ئاسمانی ساماڵ و پەڵەهەوردا دەبێت و پلەکانی گەرما بەراورد بە دوێنێ هەینی بەرزدەبێتەوە، کەشی پێشبینی کراوی سبەی یەکشەممە، ئاسمان ساماڵ و پەڵەهەوردەبێت و خێرای باش کەمێک بەرزدەبێتەوە.

دەشڵێت، ” پلەکانی گەرما لە ناوچە جیاوازەکاندا 1-3 پلە بەرزدەبێتەوە”.

هاوکات بەڕێوەبەرایەتی کەشناسی عێراق رایگەیاند، پلەکانی گەرما زیاتر بەرزدەبێتەوە و لە هەندێک ناوچە دەگاتە 30 پلەی سلیزی لەگەڵ نمەبارانێکی کەم.

لای خۆشیەوە، سادق عەتیە شارەزای کەشناسی رایگەیاند، بە درێژایی ئەم هەفتەیە پلەکانی گەرما لە زۆربەی ناوچەکانی عێراق بەرزدەبنەوە بەشێوەیەک لە رۆژدا بەرز و لە شەودا مامناوەند دەبن.

لەلایەکی تریشەوە، کەشناسی جیهانی بڵاویان کردەوە، لە رۆژی 30ـی ئازارەوە لە سەرجەم پارێزگاکانی عێراق پلەکانی گەرما بۆ سەروو 30 پلەی سەدی بەرز دەبنەوە.