کەی یەکەم رۆژی جەژنی رەمەزان دیاریدەکرێت؟
SNN-
وتەبێژی وەزارەتی ئەوقاف و کاروباری ئاینی حکومەتی هەرێمی کوردستان رایگەیاند، بۆ دیاریکردنی یەکەم ڕۆژی جەژنی ڕەمەزان ڕۆژی دووشەممە 8ی نیسانی 2024، لیژنەی باڵای بینینی مانگ بۆ دیاریکردنی یەکەم رۆژی جەژنی رەمەزان کۆدەبێتەوە.
نەبەز ئیسماعیل، وتەبێژی وەزارەتی ئەوقاف بە SNN-ی راگەیاند،”ڕۆژی دووشەممە 8ی نیسانی 2024 کە دەکات 29 یەمین رۆژی مانگی رەمەزان لیژنەی باڵای بینینی مانگ لە دیوانی وەزارەتی ئەوقاف بە ھەماھەنگی لەگەڵ لیژنە لاوەکییەکان لە پارێزگاکان بۆ دیاریکردنی ڕۆژی جەژن کۆ دەبێتەوە و ئەگەر مانگ بیندرا، ڕۆژی سێشەممە دەبێتە جەژن و ئەگەر نەبیندرا مانگی ڕەمەزان سی ڕۆژ دەبێت و ڕۆژی چوارشەممە دەبێتە جەژن.”
وتەبێژی وەزارەتی ئەوقاف وتیشی:”ئێمە لەگەڵ وڵاتی سعودیە و وەقفی سوننی عێراقی هەماهەنگیمان هەیە بۆ دیاریکردنی جەژن و پشت بە بەڵگە شەرعییەکان دەبەستین، نەک ئەوەی باسی لێوە دەکرێت، فەلەکناسییە یان شوێنی دیکە، وە زیاتریش پشت بە لیژنەکانی خۆمان دەبەستین و لیژنەی باڵای بینینی مانگ بڕیار دەدات و هەندێک جاریش ئێمە پێش وەقفی سوننی عێراقی مانگ دەبینین و پێیان دەڵێن ئەوانیش دەیکەنە جەژن ”.
