“بەگوێی فەلەكناس و كەشناس و وڵاتانی دیكە ناكەین بۆ دیاریكردنی جەژن”

SNN-عەلی حەمە سەعید

وتەبێژی وەزارەتی ئەوقاف و كاروباری ئاینی حكومەتی هەرێم ئاماژە بەوەدەكات ئیوارەی ڕۆژی 29ی ڕەمەزان لیژنەی باڵای بینینی مانگ چاودێری بینینی مانگ دەكەن و ئەگەر مانگ بیندرا ئەوا بۆ ڕۆژی سبەی دەكرێتە جەژن، جەختیش دەكاتەوە كە بۆدیاركردنی یەكەم ڕۆژی جەژنی ڕەمەزان پشت بە لێكدانەوەی فەلەكناس و كەشناس و وڵاتانی دیكە نابەستن.

نەبەز ئیسماعیل، وتەبێژی وەزارەتی ئەوقاف و كاروباری ئینی حكومەتی هەرێم بە SNNی ڕاگەیاند: ئەمڕۆ 23ی ڕەمەزانە لە 29ی ڕەمەزان لیژنەی باڵای بینینی مانگ كە لیژنەیەكی باڵایە و سەر بە وەزارەتی ئەوقاف و كاروباری ئاینی و نوێنەری لیژنەی فەتوای تێدایە ئەوان چاودێری بینینی مانگ دەكەن ئەگەر لەئێواەی 29ی ڕمەزان مانگیان بینی ئەوا 30ی ڕەمەزان ناگیرێت و دەبێتە جەژن.

ئاماژەی بەوەشكرد، ئێوارەی ڕۆژی 29 مانگ نەبیندرا ئەوا ڕەمەزان دەبێتە 30 ڕۆژی تەواو ڕۆژی داهاتووتر دەبێتە یەكەم ڕۆژی جەژنی ڕەمەزان.

وتەبێژەكەی وەزارەتی ئەوقاف و كاروباری ئاینی حكومەتی هەرێم ئەوەشی خستەڕوو، بۆ دیاریكردنی یەكەم ڕۆژی جەژن، پشت بە لێكدانەوەی فەلەكناس و كەشناس و بڕیاری وڵاتانی دیكە نابەستین بەڵكوو خۆمان بڕیاری تایبەت بەخۆمان هەیە و ئەوەش پشت بەستن بەو بڕیارەی كە لەلایەن لیژنەكەی سەر بەوەزارەتی ئەوقاف دەردەكرێت.