“تا ئەم ساتەش هیچ ئاماژەیەكمان بەدەستنەگەیشتووە بۆئەوەی هەڵبژاردن دوابخریت”
SNN-عەلی حەمەسەعید
بەرپرسی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات لەئامادەكارییەكانمان بۆ ئەنجامدانی پرۆسەی هەڵبژاردن لەوادەی خۆیدا بەردەوامین و تا ئەمرۆش هیچ ئاماژەیەك نییە بۆ دواخستن یان ئەنجامنەدانی پرۆسەی هەڵبژاردن، جەختیش دەكاتەوە كە نە لەبەرپارتی و نەلەبەر هیچ هێزێكی دیكە كارەكانمان ڕاناگرین و هەڵبژاردنیش دواناخرێت.
ئامانج عەزیز، بەرپرسی ئۆفیسی سلێمانی كۆمسیۆنی باڵای سەربەخۆی هەڵبژاردنەكانی عیراق بەSNN ی راگەیاند: ئیمەو سەرجەم ئۆفیسەكانی دیكەی كۆمیسیۆنی باڵای سەربەخۆی هەڵبژاردنەكان لەئامادەكارییەكانمان بۆ ئەنجامدانی پرۆسەی هەڵبژاردن بەردەوامین و تا ئەم ساتەش هیچ ئاماژەیەكمان بەدەستنەگەیشتووە بۆئەوەی هەڵبژاردن دوابخریت، هاوكات لەهەفتەی داهاتووشەوە لە ئۆفیسی نشتیمانی كۆمیسۆن لە بەغدا تیروپشك بۆ بەربژێر و هاوپەیمانییەتەكان دەكرێت و ژمارەی تایبەت بەخۆیانیان پێدەدرێت.
ئاماژەی بەوەشكرد، ئێمە سەرقاڵی كاری خۆمانین و بەردەوامین لەكارەكانمان، بە ئاماژەی هیچ حزب و لایەنێك كارەكانمان ڕاناگرین، هەروەك لەبەر ئەوەی كە پارتی بەشداری هەڵبژاردن ناكات ئێمە كارەكانمان ڕانەگرتووە چونكە نەك پارتی بەڵكوو هەر حزبێكی دیكە بەشداری هەڵبژاردن نەكات بەواتای ئەوەنایەت كە هەڵبژاردن ناكرێت .
ئەو بەرپرسەی كۆمیسیۆنی باڵای سەربەخۆی هەڵبژاردنەكان ئەوەشی خستەڕوو، جگە لە پارتی دیموكراتی كوردستان سەرجەم ئەو حزب و لایەنانەی كە ئامانجیان بووە بەشداری هەڵبژاردنی پەرلەمانی كوردستان بكەن، لیستی ناوی كاندیدەكانیان پێشكەش بە كۆمسیۆن كردووە، هاوكات لە بازنەی سلێمانی دوو هاوپەیمانێتی و پێنج حزب ئامادەییان بۆ هەڵبژاردن دەربڕیوەو ناوی كاندیدەكانیان بۆ كۆمسیۆن ناردووە، جیالەمە لە سنووری پارێزگاكە 22 كاندیدی سەربەخۆ ناویان تۆماركردووە.
